मालश्री धुन हेभी मेटलय्

येँ (नेपालभाषा टाइम्स) – मोहनि नखःया लसताय् न्हूकथंया मालश्री धुन सार्वजनिक याःगु दु । खिं, पछिमा, सितार, तानपुरा, जलतरंग आदि परम्परागत लोकबाजं जक छ्यलाः मालश्री धुन पिहां वयाच्वंगु इलय् लिपांगु इलय् हेभी मेटलया फ्युजन यानाः मालश्री धुन सार्वजनिक याःगु खः । ‘द लाखे ब्याण्डं’ हेभी मेटलया लसय् मालश्री धुन सार्वजनिक याःगु खः ।

नेपालभाषाया सांगीतिक ख्यलय् हे दकलय् न्हापांखुसी ‘हेभी मेटल’या म्येँ हाःगु दावी याना वयाच्वंगु ब्याण्डं थु्गुसी मोहनिया लसताय् उकथं हेभी मेटलया फ्युजनय् मालश्री धुन सार्वजनिक याःगु खः । थनिं झिंस्वदँ न्ह्यः पलिस्था जूगु ब्याण्डया ‘धम्प तछ्या.. का पासापिं धम्प तछ्या’ धाःगु म्येँ उगु इलय् तसकं लोकंह्वाःगु खः ।

थुगु हे ब्याण्डं आः सार्वजनिक याःगु हेभी मेटलया मालश्री धुनय् नवरस श्रेष्ठ, लसन तुलाधर व दीपेन शाक्यं गितार, प्रमोद आचार्यं बेस व इन्द्रमान महर्जनं ड्रमय् साथ बियादीगु दु ।