अधिकारविहीन मनपाया न्यायिक समिति

येँ – येँ महानगरपालिकाया न्यायिक समितिं याःगु निर्णय कार्यान्वयन यायेत थाकुयाच्वंगु खँ प्रमुख कानुन अधिकृत हरिमाया घिमिरें कनादीगु दु ।

महानगरया न्यायिक समितियाके खालि निगू पक्षयात मिलापत्र याकेगु बाहेक मेगु छुं हे अधिकार मदु धासें कानून अधिकृत घिमिसें धयादी, ‘न्हापा स्थानीय स्वायत्त शासन ऐनय् दण्ड जरिवाना यायेगु अधिकार दुगु खः, तर आः ला उलि यायेगु अधिकार नं मदु ।’

छुं गथे जुयाः तत्काल छुं कारबाही यायेमाःगु अवस्था वल धाःसां नं थःपिंसं छुं यायेमफुगु खँ कनादिसें वय्कलं धयादिल, ‘भाःतं कलाःयात स्या हे स्याये धकाः छेँय् पियाच्वन धाःसां भाःतम्हेसित ज्वनेगु वा पनेगु अधिकार मनपाया न्यायिक समितियाके मदु ।’ थज्याःगु समस्या वइबलय् प्रहरी प्रशासनपाखे नं गुगुं हे कथंया ग्वाहालि मजुयाच्वंगु खँ नं वय्कलं धयादीगु दु । वय्कलं धयादी, ‘अधिकार दु ला धाल तर ग्व छु अधिकार धायेगु ? ल्हाः तुति चिनाः अधिकार बियां उकिया उपयोग गथे यानाः यायेगु ?’