वाङ्मय शताब्दीपुरुष तिपूपाखें शरीर दान

येँ – वाङ्मय शताब्दीपुरुष सत्यमोहन जोशी व वय्कःया जहान राधादेवी जोशीं थः मदयेधुंकाः थःगु शरीर चिकित्सा विज्ञान प्रयोगात्मक अध्ययनया निंतिं दान यायेगु घोषणा यानादीगु दु । म्हिगः येँय् छगू ज्याझ्वलय् जोशी तिपुलिं थःपिनिगु शेष लिपा चिकित्सा विज्ञान प्रयोगात्मक अध्ययनया निंतिं किष्ट मेडिकल कलेजयात अर्पण यायेगु जानकारी बियादीगु खः । जोशी तिपुलिं किष्ट मेडिकल कलेजयात च्वयाबिउगु शरीर दान यायेगु मञ्जुरीपत्रय् हस्ताक्षर नं यानादीगु दु ।

वय्कःपिंसं थः काय् अनुराज जोशीया सहमतिइ हस्ताक्षर यानादीगु खः । शताब्दीपुरुष जोशीं थःगु शरीर ताःआयु कथं म्वायेत सफल जूगु खँय् अध्ययन यायेगु ज्याय् ग्वाहालि जुइमा धकाः स्वेच्छां दान यानागु खँ कनादीगु दु ।

शरीर दान घोषणा ज्याझ्वलय् यल महानगर पालिकाया मेयर चिरीबाबु महर्जनं शताब्दीपुरुष जोशीं शरीर दान यानाः बांलाःगु ज्या यानादीगु खँ कनादिल । मेयर महर्जनं धयादिल, ‘वय्कलं थःगु जीवनय् आपालं इतिहास च्वयादीगु दु, फुकसिया गौरव, प्रेरणा व आर्दश वय्कः जुयादीगु दु ।’

 

सम्बन्धित बुखँ

LEAVE YOUR COMMENTS