सामुदायिक केन्द्र व क्लबया मंकाः भवन शिलान्यास

येँ- येँ महानगरपालिका २० वडाय् जनसेवा सामुदायिक केन्द्र व नव युवा क्लबया मंकाः भवन निर्माण याइगु जूगु दु । २० वडाया मरु त्वाःस्थित छ्वासपाक्वय् भवन निर्माणया निंतिं आः नकतिनि शिलान्यास यायेगु ज्या जूगु दु ।

येँ महानगरपालिका प्रमुख विद्यासुन्दर शाक्य व उपप्रमुख हरिप्रभा खड्गी श्रेष्ठं मंकाःकथं भवनया शिलान्यास यानादीगु खः । भवन शिलान्यास लिपा ज्याझ्वलय् नवासें येँ महानगर प्रमुख शाक्यं शान्ति व सुरक्षा समाजया चाहना खः धासें बर्दीया प्रहरीं जक मखु विना बर्दीया प्रहरीया नं मंकाः सहभागितां जक समाजय् शान्ति सुव्यवस्था कायम याये फइ धयादिल । समाजया चाहना पूवंकेत प्रहरी व नागरिकं मंकाःकथं ज्याझ्वः न्ह्याका वनेमाःगु खँय् बः बियादिसें वय्कलं सहरी सुरक्षाया निंतिं नेपाल प्रहरीलिसे व सतक सुरक्षाया निंतिं ट्राफिक प्रहरीलिसे मिले जुयाः विना बर्दीया प्रहरी नागरिकं सहकार्य यायेमाःगु धयादिल ।

ज्याझ्वलय् केन्द्रया महासचिव विजयकृष्ण श्रेष्ठं सामुदायिक केन्द्रया भवन निर्माण लिपा शान्ति सुरक्षाया प्रत्याभूति जुइगु खँय् विश्वास प्वंकादिसें लागू वासःया व्यवहारयात नं नियन्त्रण यायेत सहज जुइ धयादिल ।

१ गू करोड ४४ गू लाख २७,३१० तका लागत अनुमान यानातःगु खःसा खुल्ला प्रतिस्पर्धापाखें छनोट जूगु सृजना गौतम कन्स्ट्रक्सन एण्ड सप्लायर्स प्रा.लिं. ८६ लाख ९८ हजार ३७८ तकां भवन निर्माण यायेगु कबोल याःगु खः ।