न्हूम्ह बेताल भैरव पलिस्था

ख्वप – स्वीस्वदँ लिपा ख्वपय् तसकं ग्यानापुम्ह द्यः कथं कयातःम्ह बेताल भैरवया न्हूगु मूर्ति स्थापना याःगु दु । स्वीस्वदँ न्ह्यः तसांनिसें दँय्दसं बिस्काः जात्राया इलय् अप्पां कयेकीगु कारणं प्वाः प्वाः जक स्यंम्ह भैलःखःया न्ह्यःने तयेमाःम्ह उम्ह द्यःया न्हूगु मूर्ति ख्वप वडा नं. ८ च्वंम्ह नारायणप्रसाद खाइतुं तयादीगु खः ।
वय्कलं हे वंगु मोहनिया इलय् नवदुर्गा गणयात छगः छगः सिजःया त्यप छायादीगु खः । दाता खाइतुं भैरवनाथ गुथि गणया गुथियारतय् इनापय् न्हूम्ह बेताल भैरव दयेकाः छानादीगु खः ।

वय्कःया छेँ लिबालिबिइ हे उगु मूर्ति दयेकूगु खः । अन छम्ह सिँकःमि, थिमिया निम्ह ख्वाःपाः दयेकीपिं कःमि, यलं निम्ह धातुया कलाकार व ख्वपया निम्ह बुट्टा कीपिं कलाकारं स्वला बिकाः थ्व मूर्ति तयार याःगु खः ।आइतवाः टौमढी लागाय् तःजिक उगु बेताल भैरव व न्यातपौया मूर्तिइ ब्व छायेगु ज्या जूगु खः । न्हूम्ह बेताल भैरवया मूर्ति थुगुसी न्हापांखुसी चैत २७ गते भैलः खतय् तयेत्यंगु दु ।

उगु मूर्ति थुगुसीया भैलःखःया दक्कलय् आकर्षण जुइगु अनुमान दु । ख्वपया भोलाछेँय् छेँ जूसां आः लिबालिबी च्वनाच्वंम्ह ५० दँया खाइतुं उगु बेताल दयेकेत दुर्लभ सिँ धाःसा ख्वपया स्वमला गल्लीइ च्वंम्ह अच्युत जोशीया लाछिं हःगु खः । उगु मूर्ति मेबलय् भैलःद्यःथाय् सिखलं चिनातइगु खः । तसकं हारांम्ह उम्ह द्यः चाःहिउ वइगु पाः लात धाःसा मनूत झ्यालं वा कःसिं कुतुं वनेयः धाइगु चलन दु ।

सम्बन्धित बुखँ

LEAVE YOUR COMMENTS