सक्वय् माधवनारायणया देगःया जग स्वन
सक्व- थनया नांजाःगु माधवनारायण द्यःया देगः दनेत जग स्वनेगु ज्या जूगु दु । ऐतिहासिक व धार्मिक तीर्थस्थलकथं कयातःगु थनया शालीनदी परिसरय् श्री माधवनारायण द्यःया देगः निर्माण यायेत्यंगु खः ।
श्री माधवनारायण स्वस्थानी व्रत तथा शालीनदी सुधार समितिया ग्वसालय् वंगु विहीवाः समितिया नायः मिजेन्द्रकाजी श्रेष्ठया सभापतित्वय् जूगु छगू ज्याझ्वःया दथुइ सक्व नगरपालिकाया प्रमुख सुवर्ण श्रेष्ठ व कागेश्वरी मनोहरा नगरपालिकाया प्रमुख कृष्णहरी थापां मंकाः कथं देगःया जग स्वनादीगु खः ।
ज्याझ्वलय् नवासें सक्व नगरपालिकाया प्रमुख श्रेष्ठं नादी खुसि सक्व देय्या हे गौरव जूगु धासें देगःया निंतिं नगरपालिकापाखें फक्व ग्वाहालि यायेगु जुइ धयादिल । वय्कलं कागेश्वरी मनोहरा व गोकर्णेश्वर नगरपालिकापाखें वइगु ग्वाहालि नं थ्व हे थासय् लगानी याना वयाच्वनागु खँ कनादिल ।
कागेश्वरी मनोहरा नगरपालिकाया प्रमुख थापां पवित्र तीर्थस्थल नादी खुसिया निंतिं नगरपालिकापाखें बजेट विनियोजन याना वयाच्वनागु जानकारी बियादिसें नगरपालिकां थगुने नं ५० गू लख बजेट विनियोजन यानागु व थुगुसी नं ५० गू लख हे बजेट विनियोजन यानागु जानकारी बियादिल ।
समितिया अध्यक्ष श्रेष्ठं नादीखुसि परिसरय् निर्माण जुइत्यंगु माधवनारायण देःया बारे जानकारी बियादिसें थगुने कोरोना संक्रमणया जोखिमया दथुइ नं माधवनारायण मेला संचालन जूसां भक्तजनपाखें वःगु दान दक्षिणा म्हो जूगु व थुगुसी मेला संचालन यानाः भक्तजनपाखें प्राप्त जुइगु दान दक्षिणपाखें हे देगः निर्माण यायेगु लक्ष्य दुगु जानकारी बियादिल ।
ज्याझ्वलय् सक्व नगरपालिकाया उपप्रमुख शुक्रलक्ष्मी श्रेष्ठ, ७ वडाअध्यक्ष विष्णुप्रसाद श्रेष्ठ लगायतया व्यक्तित्वपिंसं नं नुगःखँ तयादीगु खः । ज्याझ्वलय् जोरपाटीया हरिबहादुर श्रेष्ठं छगू लख, सक्व इपा त्वाःया पूर्णबहादुर श्रेष्ठं छगू लख न्याद्वः तका व खास्तिया सरस्वति श्रेष्ठं झिंछद्वः व न्यय्न्यातका दां आर्थिक ग्वाहालिकथं समितिया अध्यक्ष श्रेष्ठयात लःल्हानादीगु खः ।
आकिवं तकया दुने पूर्ण रुपं दयेके क्वचायेकेगु लक्ष्य कयातःगु देगःया निंतिं स्वंगू करोड न्यय्गू लख लागत तुइगु अनुमान यानातःगु दु ।
LEAVE YOUR COMMENTS