संसद विघटनया वहस हानं छवाः लिज्यात

न्यायाधीश कार्कीं इजलासं त्वःतल

येँ (नेपालभाषा टाइम्स) – संवैधानिक इजलासय् न्यायाधीश हरिकृष्ण कार्की विरुद्ध न्ह्यसः ब्वलनेवं म्हिगः संसद विघटनयात कयाः जुइमाःगु सर्वोच्चय् जुइमाःगु सुनुवाइ आः मेगु वालय् जक याइगु जूगु दु। म्हिगः प्रधानन्यायाधीश चोलेन्द्र शम्शेर राणा, न्यायाधीशपिं हरिकृष्ण कार्की, विश्वम्भरप्रसाद श्रेष्ठ अनिलकुमार सिन्हा व तेजबहादुर केसीया संवैधानिक इजलास च्वंगु खः ।

तर वरिष्ठ अधिवक्तातय्सं न्ह्यसः थनेवं संसद विघटन विरुद्धया रिटया संवैधानिक इजलासं न्यायाधीश कार्की अलग जूगु खः । म्हिगः वरिष्ठ अधिवक्ता शम्भु थापां अदालतयात अदालत थें दयेकेमाः धासें कार्की इजलासय् च्वनेगु उचित मजू धकाः आपत्ति प्वंकादीगु खः । उकथं हे अधिवक्ता दिनेश त्रिपाठीं नं कार्की बारे गम्भीर न्ह्यसः ब्वलंगुलिं बेञ्चय् मच्वनेत सुझाव बियादीगु खः । वयां लिपा कार्कीं थः इजलासय् मच्वनेगु निर्णय याःगु खः । कार्कीं जनताया दथुइ नं थःगु बारे न्ह्यसः ब्वलंगुलिं बेञ्चय् मच्वनेगु घोषणा यानादीगु खः ।

थ्वहे झ्वलय् संसद विघटनया रिटय् संविधानया धारा १२८ कि धारा १३७ अन्तर्गत सुनुवाइ जुइगु खः धइगु मेगु न्ह्यसः ब्वलंगु दु। संसद विघटनयात कयाः रिट निवेदन बिउपिं झिंनिम्ह निवेदकतय्सं संविधानया धारा १२८ अन्तर्गत बृहत् पूर्ण इजलासय् सुनुवाइ यायेमाःगु माग यासें म्हिगः हाकनं मेगु निवेदन दर्ता याःगु दु। म्हिगः संवैधानिक इजलास शुरु जुइवं कानुन व्यवसायीतय्सं बृहत् पूर्ण इजलासया माग याःगु खः ।

वइगु बुधवाः संवैधानिक इजलासय् मुद्दाया सुनवाइ जुइ । वकुन्हु उगु हे इजलासं बृहत् पूर्ण इजलासय् मुद्दा छ् वयेगु कि मछ्वयेगु धइगु निर्णय याये फइगु खँ धाःगु दु। थ्व स्वयां न्ह्यः प्रधानन्यायाधीश नेतृत्वया इजलासं वंगु पुस १० गते सुनुवाइ लिपा अदालतं प्रतिनिधिसभा विघटन यायेमाःगु कारण सहित लिखित जवाफ पेश यायेत विपक्षी राष्ट्रपति लिसें प्रधानमन्त्री व मन्त्रिपरिषद् या ज्याकू, सभामुखपिंत आदेश बिउगु खः ।

थ्वहे झ्वलय् पुलांम्ह सभामुख सुवास नेम्वाङं प्रधानमन्त्रीयाके संसद विघटन यायेगु अधिकार मदु धकाः न्ववानाच्वंगु छगू भिडियो भाइरल जूगु दु। भिडियोलय् नेवाबं न्ववायेगु झ्वलय् धयातःगु दु, ‘तं वल धायेवं प्रधानमन्त्रीं संसद भंग याइगु व्यवस्था जिमिसं चीकागु दु । आः प्रधानमन्त्रीं संसद विघटन याये फइ मखु । जिमिसं संविधानय् उगु व्यवस्था मतया ।’ वय्कलं न्हापा संविधान दयेकूगु इलय् गनं न्ववायेगु झ्वलय् उगु बिचाः तयादीगु खः ।

सम्बन्धित बुखँ

LEAVE YOUR COMMENTS