लाइसेन्स छापे यायेत मास प्रिन्टर हल

येँ – स्मार्ट लाइसेन्स छापे याइगु तःग्वःगु (मास) प्रिन्टर यातायात व्यवस्था विभागय् हःगु दु । चीग्वःगु प्रिन्टरं छापे यानाः इने बलय् माग हे फयां फये मफइगवु अवस्था वयेवं मास प्रिन्टर हःगु खः। भारतीय कम्पनी मद्रास प्रिन्टरं थुगु मेसिन नेपालय् आपूर्ति याःगु खः । मद्रासं हे नेपालय् स्मार्ट लाइसेन्स छापे यायेगु जिम्माकाःगु दु ।

थुगु मेसिनयात सिस्टमलिसे स्वायेगु निंतिं लछिया ई काइगु खँ धाःगु दु । मेसिन वःसां नं तत्काल लाइसेन्स छापे यायेफइगु अवस्था मदुगु खँ विभागया छम्ह प्राविधिक कर्मचारीं धागु दु । उम्ह कर्मचारीया कथं मास प्रिन्टरं घौछिया दुने झिंन्यासः लाइसेन्स छाये यायेफइ । प्यला दुने खुलाया दुने फुक्कं लाइसेन्स छापे यानाः नियमित अवस्थाय् हयेफइगु खँ नं प्राविधिकं धाःगु दु ।

थौं कन्हय् न्यागू लाख स्वयां अप्वः लाइसेन्स प्रिन्ट यायेगु ल्यं दनि । सरकारं स्मार्ट लाइसेन्स इनेगु ज्याय् वयाच्वंगु समस्या ज्यंकेगु नितिं मास प्रिन्टर न्यायेगु निर्णय याःगु खः । मेसिनया लिसें स्मार्ट लाइसेन्स प्रिन्ट यायेत १० लाख कार्डया आपूर्ति यायेगु जिम्मा नं सरकारं मद्रासयात बिउगु खः ।

विभागया कथं लाइसेन्स इनेगु ज्या नियमित यायेगु खःसा न्हिं प्यद्वः लाइसेन्स प्रिन्ट यायेमाः । तर थौंकन्हय् न्हिं झिंन्यासः नं लाइसेन्स प्रिन्ट जुयाच्वंगु मदु । आः मास प्रिन्टर जडान यानाः सञ्चालनय् हयेधुंकाः लाइसेन्स कायेत जुयाच्वंगु समस्या म्हो जुइगु विश्वास विभागं याःगु दु ।

देय्न्यंकं १७ गू लाइसेन्स कार्यालयपाखे लाइसेन्स इनेगु ज्या जुयाच्वंगु दु । लाइसेन्स प्रिन्ट यायेगु ज्या धाःसा येँया मिनभवनय् च्वंगु विभागया ज्याकुथिं यायेगु यानाच्वंगु दु ।

सम्बन्धित बुखँ

LEAVE YOUR COMMENTS