सडक विस्तारया पूर्णपाठ छाय् मबिउगु ?

येँ – सडक विस्तारया नामय् सर्वसाधारण जनताया छेँ थुनाः यानाच्वंगु ज्याया विरुद्ध सर्वोच्च अदालतं फैसला न्यंकूसां उकिया पूर्णपाठ आः तकं मवःगु खँय् धाःसा सरोकारवालातय्सं चिउताः प्वंकूगु दु । सूत्रतय्सं धाःकथं फैसलाया पूर्णपाठ च्वयेगु ज्या सिधयेधुंकूगु दु । तर उकी न्यायाधीशं हस्ताक्षर मयाःगुलिं पूर्ण पाठ जारी याये मछिनाच्वंगु खः ।

इजलास अधिकृतं पूर्ण पाठ च्वयेगु ज्या क्वचायेकाः न्यायाधीशपिंत बीधुंकाः नं न्यायाधीशपिंसं हस्ताक्षर मयाःगु खँ सूत्रं धाःगु दु । सडक विस्तार पीडित संघर्ष समितिं न्हापा हे पूर्ण पाठ मखुसा संक्षिप्त पाठ जक जूसां थःपिंत बिउ धकाः इनाप यानागु खःसां नं थ्व मुद्दा संवेदनशील विषय जूगुलिं याकनं निर्णय यायेगु जुइ धकाः संक्षिप्त पाठ तकं मबिउगु खँ सडक विस्तार पीडित संघर्ष समितिया दुजःया लिसें अधिवक्ता जितेन्द्र वज्राचार्यं ‘नेपालभाषा टाइम्स’ याना कनादिल ।

वय्कलं सामान्यतयाः पूर्ण पाठ वयेत प्यला न्यालाया ई काइगु खःसां नं थ्व मुद्दा भचा संवेदनशील जूगुलिं भचा अप्वः ई काःगु जुइफु धासें अदालतं मुद्दायात गुलि प्राथमिकता बीमाःगु खः उलि मबिउगु आशंका नं प्वंकादीगु दु ।
आः थ्वहे वइगु जेठ महिनाया न्हापांगु वालय् पूर्ण पाठ बी धकाः धाःगु खँ कनादिसें उकिं थःपिं विश्वस्त मजूगु खँ नं वय्कलं धयादीगु दु ।
वय्कलं धयादी, ‘न्हापा मोहनि न्ह्यः बी धाल, अनं स्वन्ति लिपा बी धाल आः तकं नं बिउगु मदुनि, विश्वस्त जुइगु आधार तकं मदयेधुंकूगु अवस्था जुयाच्वंगु दु ।’