फिल्मया पर्दाय् फुटबल
फुटबलय् नुगः क्वसाःपिनिगु निंतिं महाउत्सव धकाः धाइगु विश्वकप फुटबलया ज्वरं आपाःसित कयेधुंकल । फुटबलया दर्शक व समर्थकत नं संसारय् दकलय् अप्वः दु । वल्र्डकप फुटबल थौं न्यंकभनं चर्चाया विषय जुया च्वंगु दु । थ्वहे झ्वलय् “वल्र्ड कप ईन नेपाल” नांयागु फिल्मबारे चर्चा यायेगु सान्दर्भिक जुइ ।
थ्व खस नेपाली भाय्या फिल्म खः । गोरखा जिल्लाया बारपाक धाःगु थासय् च्वंपिं फुटबल कासाह्यमिपिन्सं फुटबल कासाया निंतिं याःगु संघर्षयात प्रतिको पर्दा न्ह्यब्वःगु खः । थुके अण्डर १९ टिमय् फुटबल म्हितीपिं खेलाडीत सुजन तामाङ्ग, सागर लामा, उमेश थापा, एलिन न्यौपाने, ऋषि थापा मगर, आदित्य चौधरी थेंज्याःपिंसं नं अभिनय यानातःगु दु ।
नेपालया फुटबल ड्रिमयात फिल्मया पर्दाय् क्यनातःगु थ्व फिल्म फुटबल खेलय् आधारित न्हापांगु नेपाली फिल्म खः, तर विदेशय् थज्याःगु फिल्म यक्व हे दु । आः वयाः नेपाःया एभरग्रीन हिरो धकाः धयातःम्ह भुवन के.सीं. थः काय् अनमोल के.सी.यात कयाः दयेकेत्यंगु “क्याप्टेन”नांयागु फिल्म नं फुटबल कासायात कयाः दयेकेत्यंगु धइगु खँ पिहां वयाच्वंगु दु ।
थ्व फिल्मय् अनमोलं टिमया क्याप्टेन जुयाः म्हितीसा सरोज खनालं टिमया कोच जुयाः म्हितीगु जूगु दु । फुटबलयात कयाः दयेकूगु गुलिखे फिल्मय् विश्वविख्यात फुटबल खेलाडीत मध्ये गुलिखे खेलाडीत फिल्मया रङ्गीन पर्दाय् नं खनेदयेक वःगु दसु यक्व दु । जिनादेन जिदाने व डेभिड बेकह्यामया नामय् ला फिल्म नं दयेकूगु दु ।
बेलायती खेलाडी डेभिड बेकह्यामया नामय् “बेण्ड इट लाइक बेकह्याम” व फ्रान्सया जिदानेया नामय् “जिदाने – अ ट्वेण्टिफस्र्ट सेन्चुरी पोटे«ट” थुकिया दसु खः । जिदाने व बेकह्यामं सन् २००५ य् “गोल ! द ड्रिम बिगिन्स” नांयागु फिल्मय् नं थःपिनिगु अभिनय शिल्प क्यनातःगु दु ।
जिदाने व बेकह्यामं सन् २००५ य् “गोल ! द ड्रिम बिगिन्स” नांयागु फिल्मय् नं थःपिनिगु अभिनय शिल्प क्यनातःगु दु ।
छम्ह मेक्सिकन युवाया फुटबल खेलाडी जुइगु सपनाय् आधारित थ्व फिल्मय् जिदाने व बेकह्याम लगायत रोनाल्डिनों नं फुटबल खेलाडीया रुपय् म्हितातःगु दु ।जिदानेया फिल्म फ्रेन्च व स्पेनिश भाषाया फिल्म खःसा डगलस गोर्डन र फिलिपी पोर्टेना थुकिया निर्देशक खः । जिदानेया खेल शिल्प क्यनातःगु थ्व फिल्म खिंचेयायेत रंगशालाय् १७गः क्यामेरा छ्यःगु खः ।
“बेण्ड इट लाइट बेकह्याम” बेलायतय् च्वनाच्वंम्ह भारतीय आप्रवासी परिवारया छम्ह मिसामचाया डेभिड बेकह्याम थें हे विख्यात फुटबल खेलाडी जुइगु सपना व उकिया निंतिं वं यायेमाःगु संघर्षया बाखं क्यनातःगु दु । थ्व फिल्मया निर्देशक नं आप्रवासी भारतीय गुरिण्डर चढ्ढा खः ।
“द यर माइ प्यारेन्ट्स वेन्ट टु भ्याकेशन” नं छगू अज्याःगु फिल्म खः गुके थः मांअबुया न्ह्यःने थःगु खेल क्यनेगु ग्वसाः ग्वयाच्वंम्ह माउरो नांयाम्ह छम्ह फुटबल खेलाडीया संघर्षया बाखं न्ह्यब्वयातःगु दु । १९७० वल्र्डकप वयेन्ह्यःया पृष्ठभूमिइ तयार यानातःगु थ्व फिल्मय् ब्राजिलया तत्कालिन राजनैतिक अवस्थायात नं स्याचुक न्ह्यब्वयातःगु दु ।
थः अभिभावक राजनैतिक परिस्थितिया कारणं विदेशय् वनाः पलायन जुइमाःगु खः धकाः मसिउम्ह माउरो इपिं लिहां वलकि थःगु फुटबल कौशल क्यनेगु मनंतुना पियाच्वनी तर इपिं लिहां वइमखु । भुटानय् कम जक फिल्म बनेजुइगु याः । उकी मध्ये नं “द कप” छगू महत्वपूर्ण फिल्मया रुपय् तयातःगु फिल्म खः । थ्व फिल्मया निर्देशक बौद्ध लामा गुरु खेन्छे नोर्बु खः ।
निर्देशक नोर्बुं “द कप” फिल्मय् वल्र्ड कप १९९८ लाईभ टेलिकास्ट स्वयेत बौद्ध गुम्बाय् टेलिभिजन छगः तयेकेत छम्ह मचाम्ह लामां याःगु संघर्षया बाखं क्यनातःगु दु । “शाओलिन सकर” नं फिल्मया पर्दाय् फुटबलया बाखं क्यनातःगु फिल्म खः । हङ्गकङ्गया थ्व फिल्मया निर्देशक स्टिफन चाओ खः ।
शाओलिन मन्दिर दुने मार्शल आटर््सया छगू खेल कुंग्फु व फुटबलया फ्युजन यानाः न्हूगु मार्शल आर्टयात थुके क्यनातःगु दु । हलिउड व बलिउडय् फुटबल सम्बन्धि फिल्मत यक्व दु उकीमध्ये “द आर्सनल स्टेडियम मिस्त्री” नं छगू खः । १९३९ या थ्व फिल्म थोरोल्ड डिकिन्सनं निर्देशन खःसा थुके छम्ह खेलाडीयात खेल मैदानय् हत्या यायेगु कुतः जूगु क्यनातःगु दु ।
आण्डे«स वुडं निर्देशनं याःगु “फुटबल स्टोरीज” अले सन् २००८ य् स्पेनिश चलचित्र “रुडो वाइ कर्सी” नं फुटबल विषयया बांलाःगु खः थ्व फिल्मया निर्देशक कार्लोस कौरान खः । हलिउडया विश्वविख्यात एक्टरत सिल्भिस्टर स्ट्यालोन व माइकल केनया मेन रोल दुगु “ईस्क्याप टु भिक्ट्री”ला फुटबलया बाखनय् आःतक पिदंगु फिल्म मध्ये दकलय् च्वछायेबहगु फिल्म खः ।
युद्धबन्दीतय्गु सास्तियात क्यनातःगु थ्व फिल्मय् बन्दीतय्गु छगू टोलीं जर्मनीया राष्ट्रिय फुटबल टिमय् फुटबल म्हितिगु खः । थुके विश्व विख्यात फुटबल खेलाडी पेलें नं फुृटबल म्हिताच्वंगु क्यनातःगु दु । ब्ल्याक पर्लया नामं संसारं म्हसिउम्ह फुटबल कासाया जादुगर पेलेें “द यर माइ प्यारेन्ट्स वेन्ट टु भ्याकेशन”य् थःगु छगू झलक क्यनातःगु दु ।
निर्देशक डेभिड सेर्रानोया स्पेनीश फिल्म “डियास डे फुटबल” फिल्मय् थः छम्ह पासाया क्वतुंगु नुगः थकायेत पासाम्हेसिनं छगू फुटबल टिम हे दयेकाक्यकीगु बाखं न्ह्यब्वयातःगु दु । स्कट्ल्याण्डय् दयेकूगु “ग्रेगरीज गर्ल” नांयागु फिल्मय् ग्रेगरी नांयाम्ह छम्ह मनुखं थः मतिनामि फुटबल खेलाडी जूगु कारणं थः नं फुटबलया अध्ययनय् लगे जुइमालीगु खः ।
वाल्ट डिज्नीया “गोल” फिल्मय् युरोपया सुपर लिग म्हितीम्ह छम्ह खेलाडीया म्हगसयात न्ह्यब्वयातःगु दु । बलिउडय् फुटबलया बाखं दुगु फिल्म मध्ये निर्देशक प्रकाश झाया “हिप हिप हुर्रे” , अनिल गांगुलिया “साहेब” , करण जोहरया “कभी अलबिदा ना कहना” यश चोपडाया “मशाल” , विवेक अग्निहोत्रीया “दे दनादन गोल” या नां न्ह्यःने लानाच्वंगु दु ।
“हिप हिप हुर्रे” फिल्मय् विद्यार्थीत व फुटबल कोच दथुया कचवं क्यनातःगु दुसा “साहेब” फिल्मय् छम्ह् मध्यम वर्गीय ल्यायम्हया फुटबल खेलाडी जुइगु सपना व आर्थिक अभावया कारणं थःगु जंलास्यें (किडनी ) मिइमालीबलय् वयागु खेल जीवनय् ब्वलनीगु समस्याया चित्रण यानातःगु दु ।“कभी अलबिदा ना कहना” फिल्मय् फुटबल खेलया इलय् दुर्घटनाय् लानाः थःगु तुति हे बांलाक चुइ मफुम्ह हिरोया जीवनय् वइगु समस्यायात क्यनातःगु दु ।
अले उगु रोल शाहरूख खानं म्हितातःगु दु । फुटबल कासाय् हाफ टाइमतक मैदानया छगू भागय् च्वनाः म्हितिगु टिम हाफ टाइम लिपा मेगु भागय् च्वनाः म्हितेमाःगु नियमयात प्रतिकात्मक रुपय् प्रयोग यानातःगु “मशाल” फिल्मय् हाफटाइम न्ह्यःतक सकारात्मक चरित्रया रुपय् खनेदइम्ह पात्र लिपा नकारात्मक जुइगु पहिला नकारात्मक जुयाच्वंम्ह पात्र लिपा सकारात्मक पात्रया रुपय् खनेदयेकः वइगु क्यनातःगु खः ।
नेपाली फिल्मय् “जीवन रेखा” य् हिरो शिव श्रेष्ठ व भिलेन गौतमरत्न तुलाधर दथुइ दशरथ रङ्गशालाय् फुटबल म्हितूगु दृश्य तयातःगु दु । फुटबलया विषय दुगु मेमेगु भारतीय फिल्ममध्ये बंगाली भाषाया फिल्म “मोहन बागानेर मेये” व “धान्नी मेये” नं च्वछायेबहगु फिल्म खः । “धान्नी मेये” फिल्मय् गामय् फुटबलया कारणं वःगु समस्यायात न्ह्यब्वयातःगु जक मखसे उकिया समाधान नं यानाः क्यनातःगु दु ।
कमेडि फिल्मया रुपय् दयेकातःगु “मोहन बागानेर मेये”फिल्मय् कोलकात्ताया नांजाःगु फुटबल टीम मोहन बागानया प्रशंसक छम्ह अभिभावकं थः काय्या इहिपाया निंतिं मोहन बागानया समर्थक हे जुइमाःगु शर्त न्ह्यःने तइबलय् सिर्जना जूगु मछिंगु परिस्थितियात हास्यात्मक रुपय् प्रस्तुत यानातःगु दु ।
LEAVE YOUR COMMENTS