स्याम्पु खुँ !

बलिउडया छम्ह अतिकं नांजाःम्ह सेलिब्रिटीत नं खुँज्या यायेगुलिइ खप्पिस धइगु खँ थ्व इलय् चर्चाय् दु । बलिउडया अतिकं नांजाःम्ह अभिनेत्री होटलं पिहां वइगु इलय् स्याम्पु खुया हइगु जुयाच्वन । उम्ह बलिउड अभिनेत्रीं होटलं चेकआउट यानाः पिहां वइगु इलय् छुं नं छुं छता ज्वलं नं ज्वनाः पिहां वइगु खँ हालय् सार्वजनिक जूगु दु ।

उम्ह बलिउड सेलिब्रिटी खः दीपिका पादुकोण । अले दीपिकाया थुकथंया बानी रहस्योदघाटन याःम्ह मेपिं सुं मखसे वया अतिकं स्याःन्याःम्ह पासा स्नेहा रामचन्दर खः ।स्नेहां फ्रेन्डशीप डे स्वयां न्ह्यः दीपिकाया वेबसाइट पेजय् च्वःगु छगू सन्देशय् ‘दीपिका पादुकोणया होटलं स्याम्पुया बोटल संकलन यायेगु बानी दु’ धकाः च्वःगु खः ।

खतुं स्नेहां उकथंया सन्देश दीपिकायात हायेकेगु ल्याखं च्वःगु खयेमाः धइगु नं अनुमान याःगु दु । स्नेहां च्वःगु कि, ‘छिं अज्याःम्ह मनू म्हसिउला, गुम्हेसिनं खुँज्या याः । जब व यात्राय् वनी, होटलं पिहां वइबलय् थःत यःगु स्याम्पुया बोटल संकलन याइ । जिं सिउ वयात छिकपिं सकसिनं माया यानादी, जिं नं याना । व खः जि अतिकं यःम्ह पासा दीपिका पादुकोण । थ्व जिपिं थेंज्याःपिं पासापिनिगु निंतिं लसताया दिं नं खः ।’