निःशुल्क भिसा चिनिया नागरिकपाखें दुरुपयोग

येँ – नेपालं बिया वयाच्वंगु निःशुल्क भिसाया सुविधायात चिनिया नागरिकतय्त दुरुपयोग याना हयाच्वंगुलिं अध्यागमन विभागं थुकी नियन्त्रण यायेगु तयारी याःगु दु । नेपालं चिनिया नागरिकतय् निंतिं पर्यटक भिसाय् सुविधा बिया वयाच्वंगु खःसा उपिं धाःसा पर्यटक भिसाय् वयाः थन व्यापार यानाच्वंगु खः ।

पर्यटक भिसाय् वयाः व्यापारया लिसें मेमेगु ज्या नं यानाच्वंगु खनेवं अध्यागमन विभागं थुकियात नियन्त्रण यायेत पलाः न्ह्याकूगु खः ।नेपालं वंगु निदँ न्ह्यवनिसें चिनिया नागरिकतय्त पर्यटक भिसाय् न्याला तकया निंतिं निःशुल्क भिसा बिया वयाच्वंगु खः । सन् २०१६ य् सार्क देय्या नागरिकतय्त लछिया निंतिं निःशुल्क भिसा बिया वयाच्वंगु खःसा चीन नं सार्कया पर्यवेक्षक जुया वयेवं चिनिया नागरिकतय्त नं १५० न्हुया निंतिं थ्व सुविधा बिउगु खः ।

निःशुल्क पर्यटक भिसाय् नेपाः दुहां वःपिं चिनिया नागरिकत चिकित्सा क्षेत्रय् लिसें मेमेगु ततःधंगु व्यापारय् तकं संलग्न जुयाच्वंगु उजुरी वयेवं अध्यागमन विभागं अनुगमन सुरु याःगु खः ।

निःशुल्क पर्यटक भिसाय् नेपाः दुहां वःपिं चिनिया नागरिकत चिकित्सा क्षेत्रय् लिसें मेमेगु ततःधंगु व्यापारय् तकं संलग्न जुयाच्वंगु उजुरी वयेवं अध्यागमन विभागं अनुगमन सुरु याःगु खः । थ्व झ्वलय् गुलिखे चिनियातय्त ज्वनाः स्वदेश लितछ्वयेधुंकूगु खँ विभागं धाःगु दु ।विभागं थ्व सम्बन्धय् गृह मन्त्रालयया ध्यानाकर्षण नं यायेधुंकूगु दु ।

चिनिया पर्यटकतय्त निःशुल्क भिसा सुविधा बीवं पर्यटक अप्वःसां समस्या नं अप्वया वःगु धासें थ्व सुविधाय् पुनर्बिचाः यायेमाल धकाः विभागं वंगु वालय् जक गृहया ध्यानाकर्षण याकूगु खः । विभागं छुं ई न्ह्यवनिसें न्ह्याकूगु निगरानी लिपा कारवाहीलय् लाःपिं अप्वः धयाथें चिकित्सा पेशा नालाच्वंगु व चिचिधंगु व्यापार यानाच्वंपिं लाःगु दु । तर थ्व समस्या चिनिया नागरिकतय् पाखें जक मेमेगु देय्या नागरिकतपाखें नं वयाच्वंगु खँ धाःगु दु ।

वंगु वालय् श्रमस्वीकृति मकासे ज्या यानाच्वंगु द्वपनय् येँया दरवारमार्गय् उत्तर कोरियाली नागरिकतय्त नं ज्वंगु खः । तर उमित बिउगु द्वपं पुष्टि यायेमफयेवं दूतावासय् लःल्हाःगु दु । दरवारमार्गं ज्वंपिं झिंछम्ह उत्तर कोरियाली नागरिक मध्ये खुम्ह पर्यटक भिसाय् नेपाः वःपिं खः । तर उमिसं भिसा दुरुपयोग याःगु पुष्टि यायेमफेवं विभागं दूतावासय् बुझे यानाबिउगु खः ।

अपराध महाशाखाया प्रमुख एसएसपी धिरजप्रताप सिंहं उत्तर कोरिया बाहेक मेमेगु देय्यापिं नं पर्यटक भिसाय् दुहां वयाच्वंगु ज्या यानाच्वंगु खँ धयादीगु दु । थगुने जक थथे हे भिसा दुरुपयोग याःपिं थ्यंमथ्यं न्यासःम्हेसितं उमिगु देश लितछ्वयाबिउगु खः ।