ने. सं. ११४४ ञलाथ्व नवमी -

कमजोर

नकतिनि हे जक जिं जि मचायात छेँय् ब्वंकः वइम्ह अध्यापिका युलिया वसिल्येभ्नायात जिगु ज्याकुथिइ सःता, वयागु तलबया ल्याःचाः यायेत । जिं वयात धया, ‘…झासँ… झासँ… दिसँ । ल्याःचाः याना हे छ्वये । छितः नं ध्यबा हथाय् जुइ । तर छि थुलि मछाः कि ध्यबा हथाय् जूसां थः हे वयाः ध्यबा माल धायेवये मफु । न्ह्यागु थजु, झीसं उबलय् हे क्वःछिनागु खः कि लय्पतिकं छितः स्वीगू रुबल बिइगु जुइ ।’
– पीगू रुबल…।
– मखु, मखु….स्वीगू । स्वीगू रुबल हे खः । जिं च्वया हे तयागु दु । जिं न्ह्याबलें अध्यापिकापिंत स्वीगू रुबल हे बीगु यानाच्वनागु खः । छिं थन ज्या यानाच्वंगु निला दयेधुंकल मखुला ….।
– निला व न्यान्हु दत ।
– खइ मखु, निलां अप्वः मजूनि । निला हे जक खः । थन जिं नोट याना तयागु दु । थ्व ल्याखं जिं छितः खुइगू रुबलय् बीमाल । तर थ्व निलाया दुने गुंगू आइतवाः लाः । छिं आइतवाः ला कोल्यायात ब्वंकी मखु । भतिचा वयालिसे चाःहिलेगु जक याइगु खः ….। अले थ्व निला दुने नखःया स्वन्हु बिदा नं लानाच्वंगु दु ।
यूलिया वसिल्येभ्नाया ख्वाः तमं च्यानावल । अय्सां वं छुं मधाः, थःगु घाँघर मिले यानाच्वन ।
– स्वन्हु नखःया बिदा यानाः झिंनिन्हु जुल । थ्व ल्याखं छिगु तलब झिंनिगू रुबल म्हो जुल । प्यन्हु ला कोल्या विरामी हे जुल, उबलय् छिं वयात मब्वंकू । …स्वन्हु तक छिगु वा स्यात । उबलय् नं जिमि जहानं छितः न्हिनय् मब्वंकूसां जिउ धकाः धाःगु खः । थ्व ल्याखं जुल न्हय्गू रुबल । आः झिंनिगू व न्हय्गू रुबल यानाः झिंगुंगू रुबल जुल मखुला । आः खुइगू रुबलय् झिंगुंगू रुबल म्हो यायेबलय् ल्यं दत पीछगू रुबल । जिं धयागु ठीक जू मखु ला …. ?
युलिया वसिल्येभ्नाया निगलं मिखाय् ख्वबि जाया वयेधुंकल । वया ख्वाः हे थरर्र खाना वयेधुंकल । नुगः ख्वाउँयाः मुसु वल, अले रुमालं थःगु न्हाय् छकःनि हुल । तर वं छुं आपत्ति मप्वंकू ।
– न्हूदँया ज्याझ्वःबलय् छिं छज्वः कप–प्लेट नं तछ्याःगु जुयाच्वन । थ्वयागु नं निगू रुबल तनादिसँ । व कप–प्लेट ला तसकं थिकेगु खः, जिमि बाज्या–बराजुया जमानायागु । तर… म्वाःलका छितः धकाः निगू रुबलं त्वःताबी । आखिर नोक्सान ला जुया हे च्वनी । गुलि ला नोक्सान फयेधुन, आः थ्व छज्वः नं वन का म्वाःल… । मेगु … छिगु लापरवाहीया कारणं कोल्या क्यबय् सीमा गःवंबलय् ज्याकेट गुका वल । ज्याकेटया झिगू रुबल । छिगु हे लापरवाहीया कारणं छम्ह भ्वातिं वार्यां लाकां खुयाः बिसिउँ वन । छिं थज्याःगु खँय् ध्यान बीमाःगु खः नि । छितः थ्व हे ज्याया निंतिं तयागु मखुला ? लाकांया न्यागू रुबल तनादिसँ…. अले १० जनवरी कुन्हु छिं जिके झिगू रुबलय् त्यासा काःगु दु … ।
– अहं, जिं ला छिके छुं कयागु मदु ।— युलिया वसिल्येभ्नां चिसलं धाल ।
– तर जिं थन नोट याना तयागु दु । का म्वाःल न्ह्यागुसां… । थ्व फुक्कं यानाः नीन्हय्गू रुबल जुल । आः पीछगूलिइ नीन्हय्गू म्हो याये । ल्यं दत झिंप्यंगू ।
वयागु निपां मिखां ख्वबि धरर्र पिहां वल । वयागु सुन्दर व छाइसे च्वंगु न्हासय् भुइचःति खनेदयावल । बिचरा मिसा ।
– जिं ला छक्वः हे जक ध्यबा कयागु खः ।— वं थरर्र खाःगु सलं धाल— ‘छि जहानयाके स्वंगू रुबल कयागु । थ्व बाहेक जिं छुं कयागु मदु …. ।
– धाथें खः ला ? थ्व ला जिं च्वयातयागु हे मदु का । आः झिंप्यंगू रुबलय् स्वंगू घटे याये । ल्यं दत झिंछगू … । कयादिसँ, थ्व छिं कायेमाःगु ध्यबा । ….स्वंगू… स्वंगू…. स्वंगू… छगू… मेगु छगू । का का कयादिसँ ।
अले जिं वयात झिंछगू रुबल बिया । वं चुपचाप ध्यबा काल, अले थरर्र खाःगु ल्हातं ध्यबा खल्तीइ तल ।
– सुभाय् ।— वं फ्रान्सिस भासं खाखातुइक धाल ।
जि जुरुक्क दना, अले क्वथाय् उखेंथुखे इरुथिरु जुया । जितः तसकं तं वल ।
– छुकिया सुभाय् ?— जिं न्यना ।
– ध्यबाया निंतिं सुभाय् ।
– तर जिं ला छंत लुटे याना । हाकनं जितः छुकिया सुभाय् ?
– मेथाय् ला जितः थुलि नं बीमखु ।
– बी मखु ? थुकी आश्चर्यया खँ छु दु ले ? जिं ला छि लिसे ख्याः जकं यानागु का । जिं ला छितः छगू क्रूर पाठ जक स्यनागु का । जिं छिगु पाइपाइ हिसाब यानाबी । थ्व स्वयादिसँ, थ्व खामय् छिगु पूवंक तलब तयातयागु दु । छिं गलत खँया विरोध छाय् याना मदीगु ? छि गय् सुम्क च्वने फुगु धयागु का । थ्व संसारय् सुं मनू थपाय्सकं बिचरा व असहाय नं जुइ ला ? छु छिगु इच्छाशक्ति अपाय्सकं कमजोर ला ? थ्व धाथें सम्भव दु ला ?
व उदास ख्वालं मुसुकाल, जिं वयागु ख्वालय् ब्वना…. ‘थ्व
सम्भव दु ।’
जिं थःगु क्रूर व्यवहारया निंतिं वयाके माफी फ्वना, अले निलाया पूवंक तलब चय्गू रुबल बिया । व तसकं अजू चायाः जितः स्वयाच्वन, अले मछिं पहलं जितः आभार प्वंकाच्वन । व जिगु ज्याकू क्वथां पिहां वन, जि धाःसा बिचाः यानाच्वना, ‘थ्व संसारय् ताकतवर जुइ तसकं अःपु जुयाच्वन ।’
भायहिउःम्ह – तेज महर्जन