पुष्पराजया याकः चिबाखं मुँज्या

यल – नेवाः न्ह्यलुवालिसें साहित्यकार डा. पुष्पराज राजकर्णिकारया याकः चिबाखं मुँज्या वंगु शनिवाः जुल । सः छगू फरक अभिव्यक्तिया ग्वसालय् वय् कःया याकः चिबाखं मुँज्या जूगु खः ।

संस्थापाखें लाया न्हापांगु शनिवाःपतिकं स्वम्ह स्रष्टायात ब्वनाः चिबाखं वाचन ज्याझ्वः न्ह्याका वयाच्वंगु खः । थुगुसी वंगु शनिवाः वय्कःया याकः चिबाखं वाचनया ज्याझ्वः जुल । ज्याझ्वलय् वय्कलं मुक्कं झिंन्यापु चिबाखं ब्वनाः न्यंकादीगु खः ।

संस्थाया दुजः नरेश अमात्यं लसकुस यानादीगु ज्याझ्वलय् मेम्ह दुजः कवि सुधीर ख्वबिं वय्कःयात मतिनाया चिं लःल्हानादीगु खःसा कवि मोक्षबहादुर अमात्यं सुकुन्दा लःल्हानादीगु खः । ज्याझ्वलय् वाचन जूगु चिबाखंयात कयाः नरसागर श्रेष्ठं समीक्षा यानादीगु खः ।

ज्याझ्वलय् याकः चिबाखं वाचन यानादीम्ह साहित्यकार राजकर्णिकार निम्हम्ह व्यक्तित्व खःसा थ्व स्वयां न्ह्यः नांजाःम्ह आख्यानकार मथुरा साय्मिया याकः चिबाखं वाचन याकेगु ज्या जूगु खः ।