जर्मनीं पोर्चुगलयात ४–२ गोलं बुकल, प्यंगू गोल धाःसा पोर्चुगलं यात

ये“– डिफेन्डिङ्ग च्याम्पियन पोर्चुगलयात स्वक्वःतकया युरो च्याम्पियन जर्मनी ४–२ गोलं बुकूगु दु । समूह एफ या शनिवाः चान्हय् जूगु कासाय् जर्मनी ४ गोलं त्याःसां प्यंगू गोल धाःसा पोर्चुगलं यात, निगू विपक्षीया पोस्टय्, निगू थःगु पोस्टय् ।

कप्तान रोनाल्डों कासाया १५ औं मिनेटय् न्हापांगु गोल यासें साविक विजेता पार्चुगलयात अग्रता बिउगु खःसां मेगु निगू गोल धाःसा पोर्चुगिज डिफेन्डरतय्सं थःगु हे पोस्टय् यात ।

कासाया ३५ औं मिनेटय् जूगु गोलयात न्हापां जर्मनीया फरवार्डर किया हार्भेजया नामय् बिउगु खःसां लिपा भिएआर पाखें स्वयाः थुकियात आत्मघाती गोल बिउगु खः । पार्चुगलया रुबिन डियासं बल क्लियर यायेत स्वःबलय् थःगु हे पोस्टय् बल दुछ्वःगु खः । थ्वयां ४ मिनेट लिपा नं पोर्चुगलपाखे छगू गोल जुल, गुगु गोल नं पोर्चुगिज डिफेन्डर गुरेइरों बल क्लियर यायेगु झ्लय् थःगु हे पोस्टय् याःगु खः ।

न्हापांगु हाफय् छगू गोलं न्ह्यःने लाःगु जर्मनीं निगूगु हाफ सुरु जुइवं आक्रमण सुरु यासें खुगू मिनेट दुने मेगु छगू गोल यात । थ्व गोल धाःसा हार्भेजया नामय् हे लात । थ्वयां ९ मिनेट लिपा कासाया ६० औं मिनेटय् गोसेन्सं थप छगू गोल यासें जर्मनीया नामय् प्यंगू गोल थ्यंकाबिल ।

कासाया ६७ औं मिनेटय् पोर्चुगलया निंतिं डिएगो जोटां छगू सान्त्वना गोल यात । जोटायात गोलया निंतिं रोनाल्डों असिस्ट याःगु खः । थ्वयां न्ह्यः रोनाल्डों याःगु गोलय् जोटां असिस्ट याःगु खः । जर्मनी विरुद्ध याःगु गोल युरो कपय् रोनाल्डोया व्यक्तिग १२ औं गोल खः । रोनाल्डो युरोय् दकलय् अप्वः गोल याःम्ह कासामि जुयाच्वंगु दु ।

थ्वयां न्ह्यः जूगु कासाय् फ्रान्सयात हंगेरी १–१ गाेलया बराबरीइ पनेत ताःलाःगु दु ।

सम्बन्धित बुखँ

LEAVE YOUR COMMENTS