राष्ट्रिय जनगणनायात कयाः अभिमुखीकरण तालिम

येँ (नेपालभाषा टाइम्स) – राष्ट्रिय जनगणना-२०७८ न्ह्यःने थ्यंलिसे उकियात कयाः नेवाःतय्सं चिउताः क्यना हःगु दु। केन्द्रीय तथ्यांक विभागं प्रत्येक झिदँय् छक्वः काइगु राष्ट्रिय जनगणनाय् नेवाःतय् जनसंख्या म्हो जूगु क्यनेगु यानाच्वंगु दु। स्वनिगलय् नेवाःतय् जनसंख्या म्हो जूगु तथ्यांकयात कयाः नेवाःतय्सं चिउताः क्यना हःगु खः ।

थ्व झ्वलय् नेवाः देय् दबू ३ नं. प्रदेश समितिया ग्वसालय् राष्ट्रिय जनगणना-२०७८यात कयाः छगू अभिमुखीकरण तालिम जूगु दु। दबूया मूछ्याञ्जे माइलाबाबु द्यःला मूपाहांकथं झायादीगु ज्याझ्वलय् विभागया निर्देशक धर्मरत्न वज्राचार्यं राष्ट्रिय जनगणना(२०७८य् हिउपाः वःगु बुँदाया विषयय् विस्तृत रुपं जानकारी बियादीगु खः ।

आकिवं जुइगु राष्ट्रिय जनगणना-२०७८य् नेवाः समुदाय सचेत व सजग जुयाः जात/जातिइ नेवाः, पूर्खाया भाय् नेपालभाषा, मातृभाषा नेपालभाषा व निगूगु भाय्कथं मेगु स्थानीय भाय् च्वकेमाःगु खँय् बः बिउगु दु। थुकथं हे धर्मया महलय् नं कुल धर्मकर्थ बौद्ध, शैव, शाक्त, वैष्णव व नेवाः धर्म धकाः च्वकेमाःगु खँय् नं सहभागितय्सं बः बिउगु दु। उगु तालिम नेवाः ल्याय्म्ह न्ह्यलुवा उमेश स्थापितया संयोजनय् जूगु खः । तथ्यांक विभागपाखें प्रत्येक झिदँय् छक्वः काइगु राष्ट्रिय जनगणना वइगु २०७८ जेठनिसें असारतक संचालन जुइत्यंगु दु ।

सम्बन्धित बुखँ

LEAVE YOUR COMMENTS