नेपालभाषां प्रधानमन्त्रीया ट्विट

येँ -प्रधानमन्त्री केपी ओलीं थम्हं प्रधानमन्त्रीया कार्यभार ग्रहण यानागु खुला क्यंगु लसताय् नेपालभाषा लगायत देय्या थीथी न्हय्गू राष्ट्रभाषां ट्विट यानादीगु दु ।

‘जिं प्रधानमन्त्रीया जिम्मेवारी कःघानागु थौं खुला क्यन । थ्वया दथुइ देय्या प्राथमिकता व थवंथवय् हनाबनाय् आधारित विदेश नीतिया जग स्वनेगु ज्या जूगु दु, सुशासन व विकासया आधारशीला तयार जूगु दु । थ्वहे आधारभूमिइ दनाः लिच्वः खने दइकथं समृद्ध नेपाः दयेकेगु अभिभारा पूवंकेगु जुइ ।’ प्रम ओलीं थःगु ट्विटय् धयादीगु दु ।

वय्कःया थ्व ट्विट नेपालभाषा लगायत भोजपुरी, मैथिली, खाम मगर, तामाङ, खस नेपाली व अंग्रेजी भासं नं तयातःगु दु ।
प्रधानमन्त्रीपाखें थीथी भासं थःगु सन्देश प्रवाह याःगु ज्यायात सकल भाषाभाषीया समुदायं सकारात्मक रुपं काःगु दु ।
प्रम ओलीया प्रेस सल्लाहकार कुन्दन अर्यालं नेपाः छगू बहुभाषिक देय् जूगु कारणं प्रधानमन्त्रीया सन्देश थ्व देशया फुक्क जनताया मांभासं हे वनेमाः धइगु ताः तयाः थ्व ज्या जूगु खँ ‘नेपालभाषा टाइम्स’ यात कनादिल ।

नेपालय् थ्व न्हय्गू बाहेक मेगु नं आपालं भाषात दुसां प्राविधिक व थःपिनि क्षमताया कारणं आःयात थुलि जक भासं प्रमया सन्देश प्रवाह जूगु खःसां लिपा लिपा मेमेगु थप भाषां नं वय्कःया सन्देश छ्वयेगु ज्या जुइगु खँ नं भाजु अर्यालं कनादिल । आः लिपा लिपा नं थज्याःगु हे विशेष अवसरय् प्रमया सन्देश थीथी भासं प्रवाह यायेगु ज्या जुइ धासें प्रम ओलीया थ्व ज्यायात ययेकूपिं सकल जनतायात नं वय्कलं सुभाय् नं बियादिल ।

सम्बन्धित बुखँ

LEAVE YOUR COMMENTS