आलम बचे यायेगु कुतःपाखें देउवा ब्याक !

येँ – हत्या आरोपय् ज्वनातःम्ह सांसद मोहम्मद आफताव आलमयात बचाउलय् लगे जूम्ह नेपाल कांग्रेसया सभापति शेरबहादुर देउवा थः हे ‘ब्याक’ जुइमाःगु दु । छन्हु न्ह्यव जक आलमयात ज्वंगु धयागु कांग्रेस विरुद्ध षडयन्त्र जूगु अभिव्यक्ति बियादीम्ह देउवां आः आलमविरुद्धया मुद्दाय् पूर्वाग्रह व दबाबमुक्त जुयाः अनुसन्धान यायेमाःगु खँ धाःगु दु ।

सभापति देउवां शुक्रवाः पार्टीया छगू प्रशिक्षण कार्यक्रमय् आलमयात ज्वंगुयात कयाः विरोध यानादीगु खः । हत्याया द्वपनय् ज्वंम्ह आलामयात बचे यायेत स्वःगु धकाः तmधंगु आलोचना जुइवं देउवां शनिवाः छगू प्रेस विज्ञप्ति हे जारी यायेमाःगु खः । देउवाः शुक्रवाः झिनिदँ न्ह्यवया घटनाय् आलमयात ज्वंगु धासें उलिमछि दँ तक छु यानाच्वन धकाः न्ह्यसः तयादीगु खः ।

आः विज्ञप्तिइ थःम्हं झिंनिदँ दयेधुंकूगु घटनाय् प्रक्रियागत ढिलासुस्ती जुल धाःसा न्यायय् ढिलासुस्ती जूगु खँ जक न्ह्यथनागु धयादीगु दु । विज्ञप्तिइ नेपाली कांग्रेस सुयातं जुइगु अनुसन्धानया विपक्षय् दनीमखु धकाः धयातःगु दु ।

२०६४ सालय् जूगु न्हापांगु संविधान सभाया निर्वाचनया इलय् निर्वाचन स्यंकेत रौतहटया राजापुरय् बम दयेकाच्वंगु इलय् आलमया दाजुया छेँय् बम विस्फोट जुयाः तःम्ह घाःपाः जूगु खः । थ्व घटना सुचुकेगु निंतिं आलमं घाःपाः जूपिंत नं अप्पा भट्टिइ यंकाः म्वाःम्वाकं च्याकाबिउगु द्वपं लानाच्वंगु दु ।

सम्बन्धित बुखँ

LEAVE YOUR COMMENTS