श्री ५ महाराजाधिराज लय्ताल – नेपाल

येँ – नेकपा एमालेया वरिष्ठ नेता माधव नेपालं थःत आममाफी बिउम्ह पार्टी अध्यक्ष केपी शर्मा ओलीयात ‘श्री ५ बडामहाराजा’ धकाः संज्ञा बियादीगु दु ।
म्हिगः छगू ज्याझ्वलय् न्ववासें वय्कलं धयादिल, ‘श्री ५ बडामहाराजाधिराजया अभिव्यक्ति वल, माधव नेपाल लगायत माननीय दुजःपिंत गुलि नं स्पष्टीकरण न्यंगु दु, उमित आममाफी बी, एम्नेस्टी इज ग्रान्टेड, जिपिं गदगद् जुया ।’

वय्कलं न्ह्यःने धयादिल, ‘महाराजधिराज खुसी जूगु दु । जिमित आममाफी दत, प्याखं ल्हुइ माःगु जुल । थ्वहे खःला पद्धति ? थुकियात कम्युनिष्ट पद्धति धाइ ला ?’ वय्कलं थःपिंत स्पष्टीकरण न्यनेगु गल्ती जुल धकाः अध्यक्ष ओलीं स्वीकार यायेमाः धासें स्पष्टीकरण लित कयां वय्कःया हाइट म्हो मजुइगु खँ नं धयादिल । नेतातय्सं एकताय् लिच्वः लाइ कथं न्वमवायेत आग्रह याःगु व ओली सुधार जुइ ला धकाः थम्हं लाथेपाथे न्वमवानागु खँ नं धयादिल ।

उकथं वय्कलं वंगु साउन ३ गते प्रतिनिधिसभा विघटन यायेगु मेगु षडयन्त्र असफल यानागु खँ नं धयादीगु दु । अध्यक्ष ओलीपाखे संकेत यासें वय्कलं प्रधानमन्त्री शेरबहादुर देउवायात छुं नं हालतय् विश्वासया मत खाके मबीगु कुतः जूगु खःसां नं थःपिंसं संसदयात बचे यानागु, संविधानया रक्षा यानागु, स्वतन्त्र न्यायपालिकाया सम्मान यानागु दु, जायज ज्या यानागु दावी नं यानादिल ।

लिसें वय्कलं पार्टीया ल्वापु पदया निंतिं मखु धासें न्ह्यसः न्यनादिल, ‘पार्टीया अन्तरविरोधया मूल कारण छु खः मालादिसँ । थ्व पद प्रतिष्ठा व इगोया लडाइँ मखु, वैचारिक मान्यता व थन खनेदुगु वैचारिक विचलन लिसे स्वानाच्वंगु अन्तरविरोध खः, पार्टी दुने खने दुगु थीथी विकृति, विसंगति, नीति, विचार, विधि व आचरणलिसे स्वानाच्वंगु विषयया अन्तरविरोध खः ।’