सुख्खा बन्दगाह बारे गुनासो प्वंकूपिं ७४९ म्ह थ्यन

येँ – चोभारय् सुख्खा बन्दरगाह दयेक मजिउ धकाः गुनासों प्वंकूपिं ७४९ म्ह थ्यंगु दु । गुनासो प्वंकेगु झ्वलय् चोभाःया स्थानीय वासिन्दा उगु लागा पर्यटकीय क्षेत्र जूगुलिं अन पर्यटकीय क्षेत्र कथं विकास यायेमाः धकाः थःपिनि सुझाव नं च्वयाथकूगु दु । स्थानीय जनतां गुनासो प्वंकेगु जक मखुसें थःपिनिगु गुनासो सरकारया सम्बन्धित निकाययात बोधार्थ नं बिउगु दु ।

उगु बोधार्थ वडाध्यक्ष निसें प्रधानमन्त्रीयात तकं बियागु जानकारी चोभार संरक्षण समितिया संयोजक पञ्चलाल महर्जनं ‘नेपालभाषा टाइम्स’ यात कनादीगु दु । जनताया विरोधया बाबजुद तःधंगु ल्याखय् प्रहरी परिचालन यानाः जबरजस्ति बन्दरगाह दयेकाच्वंगु धासें उकियात तुरुन्त दिकेमाःगु माग स्थानीय जनतां यानाच्वंगु दु ।

थ्वहे झ्वलय् चोभार संरक्षण समितिया ग्वसालय् झिगू थीथी त्वालय् अन्र्तक्रिया ज्याझ्वः क्वचायेके धुंकूगु दुसा थ्वहे वइगु १५ गते वडास्तरीय सर्वपक्षीय अन्र्तक्रियात्मक ज्याझ्वः यायेगु कथं तयारी जुयाच्वंगु खँ संयोजक महर्जनं कनादीगु दु । अथेहे फागुन २१ गते नगरस्तरीय भेला यायेगु नं वय्कलं जानकारी बियादीगु दु ।

अथेहे चैत महिनाय् राष्ट्रियस्तरया अन्र्तक्रिया यायेगु कथं नं तयारी जुयाच्वंगु दु । चोभाःयात सुख्खा बन्दरगाह दयेके बलय् राष्ट्रयात दीर्घकालीन लिच्वः लाइ धासें अन बन्दरगाह दयेके मजिउगु माग स्थानीय जनतां याःगु खः । संयोजक महर्जनं बियादीगु जानकारी कथं स्थानीय जनतां प्वंकूगु गुनासोयात कयाः वंगु आइतवाः सरकारी पक्षं रिपोर्ट कायेगु ज्या याःगु दु ।

भौतिक पूर्वाधार तथा योजना मन्त्रालयया सचिव केदारबहादुर अधिकारीया पुचलं उगु रिपोर्ट काःगु खः । समितिपाखें थीथी त्वालय् अन्र्तक्रिया यायेगु झ्वलय् सरकारी कर्मचारीतय्सं स्थानीय जनता दथुइ भ्रम ब्वलंकेगु कुतः जुयाच्वंगु जानकारी नं बीगु यानाच्वंगु दु ।

सरकारी कर्मचारीतय्सं सुख्खा बन्दरगाह दयेकेबलय् स्थानीय जनतायात रोजगारी चूलाइ, आः दुगु सतकं मखुसे मेगु हे सतकं सुख्खा बन्दरगाह वइगु जूगुलिं ट्राफिक जामया समस्या मदइगु धकाः सरकारी कर्मचारीतय्सं ह्ययेकेगु ज्या यानाच्वंगु खँ संयोजक महर्जनं कनादीगु दु । संरक्षण समितिं अन्र्तक्रियाया झ्वलय् स्थानीय जनतायात सुख्खा बन्दरगाहं जुइगु बेफाइदाया बारे थुइकेगु ज्या यानाच्वंगु खः । आः फुक्क धयाथें वडाया जनता चोभारय् सुख्खा बन्दरगाह दयेके मजिउगु निष्कर्षय् थ्यंगु खँ नं वय्कलं कनादीगु दु ।