आः न्ह्यःने वयाच्वंगु यँयाः छु जुइ ?
येँ (नेपालभाषा टाइम्स) – कोरोनाया कारणं स्वनिगः दुने न्यायेकीगु जात्रा पर्वत छगूयां लिपा धमाधम बन्द जुजुं वनाच्वंगु झ्वलय् आः न्ह्यःने वयाच्वंगु येँया तःधंगु पर्व यँयाः छु जुइ धइगु नं न्ह्यसः पिहां वःगु दु। थ्व विषययात कयाः इन्द्रजात्रा व्यवस्थापन समितिपाखें गुथि संस्थान, येँया सीडीओलिसे म्हिगः व म्हीग खँल्हाबल्हा याःगु दुसा आः येँ महानगरपालिकालिसे नं खँ ल्हायेत स्वयाच्वनागु जानकारी समितिया नायः गौतम शाक्यं ‘नेपालभाषा टाइम्स’ यात बियादिल ।
यँयाः न्यायेकेगु वा मन्यायेकेगु विषयय् म्हिगः गुथि संस्था व येँया सीडीओलिसे नं खँल्हाबल्हा यानाबलय् सीडीओपाखें यँयाः पर्वया बारे नेपाल सरकार दुने तकं सहलह जुयाच्वंगु जानकारी बियादीगु खः । यँयाः थेंज्याःगु पर्व न्ह्याके हे माः धइगु सकस्यां बिचाः खःसां थौंकन्हय् संक्रमण धमाधम अप्वया वनाच्वंगु कारणं थुगुसी छकः जात्रा मन्यायेकूसां जी ला धइगु सरकारया आशय जुयाच्वंगु जानकारी नं सीडीओपाखें वःगु खँ सीदुगु दु ।
इन्द्रजात्रा व्यवस्थापन समितिं थःपिं जात्रा न्यायेकेगु लागिं पूर्ण तयारीया अवस्थाय् दुगु जानकारी यासें सरकारया निर्णय छु जुइ याकनं सार्वजनिक याये माल धकाः इनाप याःगु खः । जात्राया लागिं थ्वहे भाद्र ३ गते यःसिं काः वनेमाःगु ज्याझ्वः दु। छुं जुयाः भाद्र ३ गते यःसिं काः वन व यःसिं येँय् दुहां वल धाःसा वयां लिपा यँयाःया सम्पूर्ण जात्रा छसिकथं न्ह्याना वनी धासें सरकारया निर्णय भाद्र ३ गते न्ह्यः हे वयेमाःगु माग नं समितिं नं याःगु खः ।
सीडीओ व गुथि संस्थानं निन्हु स्वन्हु लिपा हे थुकिया बारे सरकारया धापू सार्वजनिक जुइगु आश्वासन बिउगु खँ नं नायः शाक्यं बियादिल । यःसिं काः वनेगु ज्या केन्द्रीय मानन्धर संघया ग्वसालय् जुइगु खः । उकिं यःसिं काः वनेगु वा मवनेगु धइगु सवालय् संघ दुने नं सहलह जुयाच्वंगु खँ सीदुगु दु । यँयाःलिसे स्वापू दुगु २९ गुलिं गुथि खलः धाःसा जात्रा न्यायेकेगु लागिं तयारी अवस्थाय् दुगु खँ नं नायः शाक्यं कनादिल ।
LEAVE YOUR COMMENTS