शंखधर व पद्मया झ्वाता तइगु

येँ मनपाया बजेट पारित

येँ – वरिष्ठ मानव अधिकारवादी नेता, जनजाति आन्दोलनया नेता लिसें नेवाः न्ह्यलुवा पद्मरत्न तुलाधरया झ्वाता तयेगु लागिं येँ महानगरपालिकां थुगु आर्थिक दँय् बजेट फ्याःगु दु । झ्वाता गन तयेगु धकाः क्वःमछिउनिसां झ्वाता तयेगु लागिं थुगु आर्थिक दँय् १५ लाख तका बजेट विनियोजन याःगु खः ।

अथे हे नेपाल संवत्या प्रवर्तक लिसें राष्ट्रिय विभूति शंखधर साख्वाःया झ्वाता तयेगु लागिं नं १५ लाख तका दां विनियोजन याःगु दु । शंखधरया झ्वाता येँया शंखधर पार्क (पुलांगु रत्न पार्क) दुने तयेगु निर्णय जूगु दु । लिसें शंखधरपार्कयात बांलाकेगु लागिं नं बजेट फ्याःगु दु । येँ मनपाया नगरसभां म्हीग पारित याःगु आ.व. २०७६-७७ या वार्षिक बजेट तथा कार्यक्रमय् थ्व बजेट विनियोजन याना तःगु दु ।

अथे हे नगरसभां वडा सदस्यतय्त बैठक भत्ता वापत दइगु द्वःछि तकायात नं बढे यानाः झिंन्यासः तका याना बिउगु दु । बैठकय् वडा सदस्यतय्सं थःपिंत छुं हे कथंया सुविधा मदुगु बारे सः तयेवं थ्व बैठक भत्ता बढे यायेगु निर्णय जूगु दु । थज्याःगु बैठक लछिया प्यक्वः तक च्वने दइ ।

अथे हे मनपां तःधंगु झिंन्यागू वडायात ३ करोड तका, मझौला झिगू वडायात २ करोड तका व चीधंगु न्हय्गू वडायात १ करोड ५० लाख तका भौतिक पूर्वाधार विकास बजेट छ्वयेगु निर्णय नं याःगु दु । मनपां थुगुसी थ्यंमथ्यं १५ अर्ब तकाया बजेट दयेकूगु खः ।