गुक्वःगु भर्चुअल हाइकु वाचन
येँ – नेवाः हाइकु ख्यःया ग्वसालय् वंगु शनिवाः गुक्वःगु संस्करणया भर्चुअल हाइकु वाचन ज्याझ्वः जुल । हाइकु ख्यलं लय्पतिकं प्यम्ह प्यम्ह च्वमियात १०–१०पु हाइकु वाचन याका वयाच्वंगु खः ।
वंगु वालय् जूगु संस्करणय् मोक्षबहादुर अमात्य, शाक्य सुरेन, किरण शाक्य व विजयरत्न असंबरे प्यम्हेसिनं म्हतिं झिपु झिपु हाइकु वाचन यानादीगु खः ।
ज्याझ्वलय् वाचन जूगु हाइकुया समीक्षा यानादिसें नांजाःम्ह साहित्यकार डा. आनन्द जोशीं थौंया इलय् नेपालभाषाया हाइकु विधा परिमार्जित जुया वनाच्वंगु व आधुनिक हाइकुं थाय् कया वयाच्वंसां नेपालभाषाय हाइकु ख्यःया विधायात कयाः आपालं सहलह ब्याके माःगु आवश्यक दुगु खँ धयादिल ।
साहित्यकारलिसें समीक्षक डा. पुष्पराज राजकर्णिकारं विषयया गहनतालिसें पाठकं हाइजिनपिंसं हाइकु कलाय् ध्यान बीमाःगु खँय् बः बियादिल ।
ज्याझ्वलय् केशरमान ताम्राकार व दिलबहादुर चित्रकारं नं नुगःखँ तयादीगु खः ।
LEAVE YOUR COMMENTS