ज्ञानीराजा मानन्धर

छखे च्वंच्वंम्ह काय् मां नापलाः वन ! खँया खँय् मांम्हेसित धाल ‘उकुन्हु ककाबाज्याया छय् बियाछ्वःबलय् छिपिं छम्ह हे लिमलाः धका भ्वजय् मवः ! क्वसः जिं न्यानाः तया बिया न्हां !’

‘ए ! धाथें ! जि ला ल्वःमने धुंकूगु का ! लीया घः हे तया बियागु खः मखुला ?’

‘खः ! २७०० तुल ! छंगु बच्छि, जिगु बच्छि ! आः जितः १३५० दां माल का !’

मांम्ह पर्सीइ चिनातःगु म्हिचां १५०० दां लिकया काय् यात बिल !

काय्म्ह ‘जिके सत्या चांचू मदुनि ! लिपा बी न्हां !’

‘लित हे मबिउसां छुं मपाः !’

मोहनिया नखत्या कुन्हु छेँय् वःबलय् मांम्ह बैगलय् च्वनाः तरकारी ल्ययाच्वंगु ! भौम्हं म्वाःम्वाः धाःसानं माजुया तुतिइ भ्वपु वन ! काय्म्हं मांम्हेसित ‘कुने क्वथाय् छकः नु’ धयाः नापं ब्वना यंकल ! पर्सं सत्या दां लिकयाः मांम्हेसित ‘थ्व उकुन्हु छन्त लित बी मानिगु ध्यबा !’ धकाः बिल ।

मांम्ह म्वाःल धाःसां काय्म्हं धाल ‘हिसाब धयागु , हिसाब का मां !’

कायया खँ न्यनाः मांम्ह ताः ई न्ह्यवनिसें मिखाय् मुनातःगु ख्वबि हाय्कल ! थ्वासा थ्वासा मुसु तयाः हि हि लनाः ख्वल ! अले धाल, ‘जिं मचांनिसें छंगु खि च्व हुया छंत ब्वलंकागु ! छ मफइबलय् चछि चछि न्ह्यः पाः यानागु ! जिपिं बुराबुरी जुइबलय् छंगु लिधंसाय् म्वाय् मानि धकाः थः द्यांलानाः छंगु प्वाः सदां जायेका च्वनागुया हिसाब ग्व ? हिसाब हे यायेगु खःसा थ्व फुक्कया हिसाब नं लिपा वयेबलय् लुमंक ज्वना वा ! पर्सय् मन्ह्यंसा झोलाय् तयाः ज्वना वा पुता !’

सम्बन्धित बुखँ

LEAVE YOUR COMMENTS