ने. सं. ११४६ तछलागा आमै -

कान्तिपुर, अनलाइनखबर, हिमालय टेलिभिजनया ज्याकू न्ह्यःने गाडी पार्किङ

आतंक ब्वंकेगु कुतः : महासंघ

येँ (नेपालभाषा टाइम्स) – नेपाल पत्रकार महासंघं थीथी सञ्चार माध्यमया ज्याकू न्ह्यःने गेटय् शंकास्पद रुपय् गाडी पार्किङ यानाः पत्रकारतय्त समाचार संकलनया निंतिं वनेत पंगः थंगु वं आतंक ब्वलंकूगु धासें थःपिनिगु गम्भीर ध्यानाकर्षण जूगु खँ धाःगु दु । महासंघं म्हिगः जारी याःगु विज्ञप्तिइ तीनकुनेस्थित कान्तिपुर पब्लिकेशन, न्हूबानेश्वरस्थित अनलाइन खबर व मध्यबानेश्वरस्थित हिमालय टेलिभिजनया ज्याकूया गेटय् सवारी साधन पार्किङ यानाः पत्रकातय्त वये वने यायेत हे पंगः थंगु खँय् थःपिनिगु ध्यानाकर्षण जूगु खँ धाःगु दु । लिसे घटनाया तत्काल छानबिन यानाः दोषीयात कारबाही यायेत नं सम्बन्धित निकायया ध्यानाकर्षण याकूगु दु ।

उकथं हे नेकपा एमालें थीथी सञ्चार माध्यमया ज्याकू न्ह्यःने शंकास्पद रुपय् गाडी पार्किङ यानाः पत्रकार व सञ्चारकर्मीतय्त आतंकित याःगु धासें आपत्ति प्वंकूगु दु । एमाले प्रचार विभाग प्रमुख निरज आचार्यं थज्याःगु ज्यां लोकतन्त्र व प्रेस स्वतन्त्रताय् तप्यंक प्रहार याःगु खँ धाःगु दु ।

अथेहे राष्ट्रिय स्वतन्त्र पार्टीं नं थीथी सञ्चार माध्यमया ज्याकू पिने गाडी दिकातःगु खँय् थःपिनिगु ध्यानाकर्षण जूगु खँ धाःगु दु । रास्वपाया महामन्त्री विपिन आचार्यं छगू विज्ञप्ति जारी यासें मिडियायात मनोवैज्ञानिक दबाबय् तयेत याःगु थज्याःगु शंकास्पद व रहस्यमय गतिविधि लोकतान्त्रिक मूल्य मान्यताया तप्यंक उल्लंघन जूगु खँ धाःगु दु । विज्ञप्तिइ धयातःगु दु, ‘छगू लोकतान्त्रिक, जिम्मेवार व विधिया शासनय् विश्वास याइगु राजनीतिक दलया हैसितयं रास्वपा न्ह्याबलें पूर्ण प्रेस स्वतन्त्रता, नागरिकया सुसूचित जुइ दइगु मौलिक अधिकार व स्वतन्त्र पत्रकारिताया पक्षय् दृढतापूर्वक दनाच्वंगु दु ।’

उकथं हे घटनायात कयाः तत्काल निष्पक्ष व सत्यतथ्य छानबिन यानाः फुक्कं सञ्चार माध्यमया भौतिक व मनोवैज्ञानिक सुरक्षा सुनिश्चित यायेत व शंकास्पद गतिविधिइ दुथ्याःपिं न्ह्याम्ह हे जूसां तत्काल म्हसिका कानुन कथं कारबाही यायेत माग नं यानातःगु दु ।

म्हिगः थीथी सञ्चार माध्यमया लिसें नेपाली कांग्रेसया सभापति गगन थापाया रातोपुलस्थित छेँय् न्ह्यःने नं थथे शंकास्पद गाडी पार्किङ यानातःगु खः । स्थानीयतय् कथं बीएसी ९५७५ नम्बरया गाडी म्हिगः सुथय् ७ः३० बजे निसें थापाया छेँया न्ह्यःने पार्किङ यानातःगु खः । उकथं अनामनगरस्थित भाटभटेनी सुपर मार्केट न्ह्यःने नं थथे हे गाडी पार्किङ यानाथकूगु लूगु दु ।

प्रहरीं म्हिगः फुक्कं गाडीयात क्रेनया ग्वाहालिं चीकेगु ज्या याःगु खःसा सञ्चार माध्यमया न्ह्यःने तयातःगु गाडीयात कयाः अनुसन्धान न्ह्याकूगु दु ।

गाडी सुयागु खः ?
थीथी थासय् तयातःगु गाडीया थुवाः बारे म्हिगः हे सार्वजनिक जूगु दु । अनलाइन खबरया गेट न्ह्यःने तयाःगु बा. १२ च ८५४५ नम्बरया गाडी सुनिल पौडेलया नामय् दुगु खँ यातायात व्यवस्था विभागं धाःगु दु । उकथं कान्तिपुर पब्लिकेशनया न्ह्यःने पार्किङ यानातःगु प्रदेश –०१–०३४ च ८४८० नम्बरया जिप सानिमा बैंकय् त्यासा कयाः एसटी मोटर्सं छ्यला वयाच्वंगु खः । थ्व गाडी रास्वपाया नेता रवि जैसवालया जूगु खँ सीदुगु दु । हिमालय टेलिभिजनया गेटय् पार्किङ यानातःगु बा. १० च १२५५ नम्बरया कार डीआर अटो मोटिभ्सया नामय् दर्ता जुयाच्वंगु दु । उगु अटो मोटिभ्सया ठेगाना धुम्बाराही न्ह्यथनातःगु दु । उकथं हे अनामनगरस्थित भाटभटेनी सुपर मार्केट न्ह्यःने दिकातःगु ०३३ च ४२७५ नम्बरया गाडी थुवाःया म्हसिका लुइके मफुनि ।