बागमति प्रदेशं बचत लितबीगु ज्या न्ह्याकीगु

येँ (नेपालभाषा टाइम्स) – बागमति प्रदेश सरकार अन्तर्गतया समस्याग्रस्त सहकारीया बचत लितबीगु ज्या न्ह्याकूगु जूगु दु । प्रदेशया सहकारी व्यवस्थापन समितिया ज्याकूथिं प्रदेश दुनेया समस्याग्रस्त घोषित न्यागू सहकारी व चीधंगु बचतकर्तातय् बचत लितबीगु प्रक्रिया न्ह्याकेगु खँ धाःगु दु ।

समितिं प्रेस विज्ञप्ति जारी यासें असार ३० गते निसें बचत लित बीगु ज्या न्ह्याकेगु जानकारी बिउगु खः । बागमति प्रदेशया मुख्यमन्त्री इन्द्रबहादुर बानियां जावलाख्यलय् च्वंगु प्रदेश सुशासन केन्द्रया सभा हलपाखें बचत लितबीगु ज्या न्ह्याकीगु ज्याझ्वः दु ।

समितिया कथं बचत लित जुइगु सहकारीत मध्ये सोल्टिमोडया सिभिल बचत व ऋण सहकारी संस्था, किपया दर्शन बचत तथा ऋण सहकारी संस्था, पूच्वःसुमेरु बचत तथा ऋण सहकारी संस्था, सामाखुसीइ च्वंगु नेशनल नमोबुद्ध बचत तथा ऋण सहकारी संस्था व खुसीबुँइ च्वंगु लालीगुराँस बचत तथा ऋण सहकारी संस्था खः ।

समितिया कथं न्हापांगु चरणय् थुपिं न्यागू समस्याग्रस्त सहकारीया चिधंगु बचतकर्तातय्त प्राथमिकताय् तःगु दु । उकी मध्ये प्रति बचतकर्ता अधिकतम छगू लाख तका बचत ध्यबा लितबीगु खँ समितिं न्ह्यथंगु दु ।