हाकनं लकडाउन यायेमाःगु सिफारिस

येँ (नेपालभाषा टाइम्स) – स्वास्थ्य तथा जनसंख्या मन्त्रालयं सक्रिय संक्रमितया ल्याः २५ हजार थहां वन धाःसा हाकनं लकडाउन यायेत सिफारिस याःगु दु ।

मन्त्रालयया इन्सिडेन्ट कमाण्ड सिस्टमया बैठकं २५ हजार स्वयां अप्वः सक्रिय संक्रमित जुल धाःसा लकडाउन यायेमाःगु निष्कर्ष पिकागु खः । २५ हजार स्वयां अप्वः संक्रमित जुल धाःसा अस्पतालया पूर्वाधारं व्यवस्थापन यायेत थाकुइगु खँ मन्त्रालयया प्रवक्ता डा. जागेश्वर गौतम धयादीगु दु ।

मन्त्रालयया तथ्यांक कथं म्हिगः तक देय् न्यंकं सक्रिय संक्रमितया ल्याः १७४१४ म्ह दु। लिसे मन्त्रालयं जनस्वास्थ्य मापदण्ड पालना जुइ मफइगु व्यवसाय लछिया निंतिं बन्द यायेत नं सिफारिस याःगु दु। थ्व स्वयां न्ह्यः वंगु चैत ११ गते निसें न्हापाखुसी लकडाउन याःगु खःसा वयां लिपा भदौं ३ गते निसें देय् या थीथी थासय् निषेधाज्ञा घोषणा याःगु खः ।

स्वनिगलय् घोषणा यानातःगु निषेधाज्ञा छुं छ्वासुकूगु खःसां नं निषेधाज्ञा धाःसा अझ नं जारी हे जुयाच्वंगु खँ स्वनिगःया जिल्ला प्रशासन ज्याकुथी धायेगु यानाच्वंगु दु ।

सम्बन्धित बुखँ

LEAVE YOUR COMMENTS