वहया लुँति अजिमा द्यःया प्राण प्रतिष्ठा
येँ- थनया धल्कोस्थित लुति अजिमा द्यःयाथाय् वहःया न्हूगु द्यःया प्रतिमा पलिस्था याःगु दु । अजिमा द्यःया न्हूगु प्रतिमाया तान्त्रिक विधिपाखें पुजा यानाः प्राण प्रतिष्ठा नं याःगु खः । वंगु बुधवाः वज्रयानी पम्पराकथं तान्त्रिक विधिपाखें पुजा यानाः वहया न्हूम्ह लुँति अजिमाया प्राण प्रतिष्ठा याःगु खः ।
धल्को त्वाःया स्थानीयावासीलिसें समाजसेवी लक्ष्मीदेवी खड्गीं देछानादीगु वहःया लुँति अजिमाया न्हूगु प्रतिमा (प्रतिमूर्ति) विधिवत पुजा व प्राण प्रतिष्ठायासें देगलय् थापना याःगु खः । शाही खड्गी समाज, धल्कोया संयोजनय् समाजसेवी
खड्गीया छेँनिसें नाय्खिं, बासुरिसहितया सांस्कृृतिक बाजंलिसे छगू शोभा यात्रा यानाः नगर परिक्रमा यासें लुँति अजिमा देगलय् बिज्याकूगु खः ।
मूल पुरोहित कमलरत्न वज्राचार्य, मूलाचार्य राजु वज्राचार्य, सिद्धिमुनि वज्राचार्य, कर्माचार्य सुरज वज्राचार्य, पूर्वाचार्य रविन्द्र वज्राचार्य, दक्षिणाचार्य सुवन वज्राचार्य, उत्तराचार्य सजनरत्न वज्राचार्य गुरुजुपिं जानाः प्राण प्रतिस्थापन याःगु खःसा आयुष वज्राचार्य व निर्मल वज्राचार्यं अतिकं महत्वं जाःगु होम पुजाय् विशेष सहयोगीया भूमिका म्हितादीगु खः ।
अथे हे पुजाय् गुरुमांपिं अष्टलक्ष्मी बज्राचार्य, अम्बिका बज्राचार्य, मन्दिरा बज्राचार्य, ज्योत्सना बज्राचार्य, करुणा बज्राचार्य, अनिता बज्राचार्य, देवेन्द्रेश्वरी बज्राचार्य नं महत्वपूर्ण भूमिका म्हितादीगु खःसा वय्कःपिंत एलिसा बज्राचार्य, लक्ष्मी बज्राचार्य, सुशिला बज्राचार्य, निया बज्राचार्यं ग्वाहालि यानादीगु खः ।
उगु इलय् लुँति अजिमाया देगःया जवपाखे पलिस्था याःगु ल्वहंपौया नं अनावरण याःगु खः । स्वनिगलय् विराजमान थीथी अजिमामध्ये लुँति अजिमाया विशेष महत्व दु । थुम्ह अजिमा द्यःया बालाचः¥हेया इलय् तःजिक जात्रा यायेगु याना वयाच्वंगु दु ।
LEAVE YOUR COMMENTS