बल्ल सिधल शान्तिपूया जीर्णोद्धार

येँ – भुखाचं तःधंक क्षति जूगु स्वयम्भूया शान्तिपुर देगःया जीर्णोद्धार क्वचाःगु दु । प्यंगू करोड तका खर्च यानाः उकिया जीर्णोद्धार याःगु खः । भुखाय् लिपा देगः दुना वइथे च्वनेवं स्वयम्भू व्यवस्थापन तथा संरक्षण महासमितिं देगःया जग व प्यखेरं च्वंगु पःखाः थुनाः जीर्णोद्धार लिसें माःथाय् पुनःनिर्माण समेत याःगु खः ।

स्वयम्भूया संरक्षण तथा व्यवस्थापनय् सक्रिय महासमितिया महासचिव महेन्द्ररत्न बज्राचार्यं कनादी कथं स्वदेशी व विदेशी दातृ संस्थापाखें मुंगु आर्थिक स्रोतपाखें खर्च याःगु खः । वय्कःया कथं तन्त्रया दीक्षा कयातःपिं सिँकःमि, दँकःमितय्पाखें देगः दनेगु ज्या जूगु खः । अन दुने गोप्य भ्वं, तान्त्रिक पुजाया अभ्यास व तान्त्रिक देवदेवीया साधना विधित तयातःगु दु ।

थ्व सम्पदा गबले दयेकूगु खः छुं सी मदुनि । सर्वसाधारणयात दुने दुत छ्वइ मखु । शान्तिपुर दुने च्वयातःगु अंगःकिपात मल्लकालीन ईलिसे मिले जूगुलिं च्यागूगुनिसें १२औँ शताब्दीया दथुइ उगु देगः निर्माण जूगु विश्वास यानातःगु दु ।सम्पदा प्राचीन खःसां लिपांगु इलय् विकास जूगु प्रविधि प्रयोग यानाः मर्मतसम्भार याःगु खः ।

स्वयम्भू व थुकिया जःखः शान्तिपुर, अग्निपुर, वायुपुर, नागपुर, अनन्तपुर लगायतया महत्वपूर्ण सम्पदात दु । अग्निपुर, शान्तिपुर, प्रतापपुर व पुलांगु तामाङ गुम्बा पूर्णरूपं दुंगु खः ।पुरातत्व विभागया कथं २०७२ या भुखाचय् लानाः देय्न्यंकंया कूल ७५३ गू चैत्य, देगः, गुम्बा लगायत सम्पदा क्षति जूगु खः ।