दाप्चाय् बैद्यबाःया सुटिङ

यल(नेपालभाषा टाइम्स)÷ शताब्दी पुरुष सत्यमोहन जोशीं थःगु जीवन कालय् च्वयाः थःगु हे लाछि बखुंबहालय् क्यनादीगु पूधा प्याखं बैद्यबा आः संकिपा जुयाः पिहां वइगु जूगु दु । वंगु शनिवाः व आइतवाः निन्हुयंकं दाप्चाय् बैद्यःया शुटिङ जूगु दु । थन बैद्यबाया जीवनया अन्तिम घटना कथं शाक्य भाजुनापं मोटरसाइकलय् च्वनाः नेपालभाषाया कोष सफू छापे यायेत वंगु घटनाया दृृृश्य सुटिङ याःगु खः ।

बैद्यबा सत्यमोहन जोशीं यथार्थ घटनाया आधारय् च्वयादीगु पूधाः प्याखं खः । उकियात संकिपा कथं मूर्त रुप बिइत निर्देशक शान्तराज शाक्यं संकिपाय् निर्देशकया भूमिका म्हितादीगु दु । शरद कसाः व पूर्णिमा शाक्यया मू भूमिका दुगु थुगु संकिपाय् अनिता ताम्राकार, शशीकला मानन्धर, नविन थेच्वमि, किरण शाक्य, धर्मकृष्ण श्रेष्ठलगायत स्वीम्ह न्हूपिं पुलांपिं कलाकारपिंसं अभिनय याःगु दु । यल व दाप्चाय् सुटिङ जूगु थुगु संकिपाया सहनिर्देशन कृष्ण प्रजापति खः ।