ताम्रकार समाजया मंकाः मुँज्या व तःमुँज्या
यल(नेपालभाषा टाइम्स)÷ ताम्रकार कुलदेवता उग्रचण्डी माई संरक्षण समिति (ताम्रकार समाज)या नीन्याक्वःगु मंकाः मुँज्या व झिंन्याक्वःगु तःमुँज्या वंगु शनिवाः थनया जावलाख्यलय् च्वंगु तमकः द्यः (उग्रचण्डी) कुलदेवता परिसरय् जुल ।
समाजया नायः विनोद ताम्रकारया सभापतित्वय् जूगु ज्याझ्वःया उलेज्या मूपाहां बागमति प्रदेशया उद्योग, वाणिज्य भूमि तथा प्रशासन मन्त्री रामकृष्ण चित्रकारं त्वाःदेवाय् मत च्याकाः यानादीगु खः । ज्याझ्वलय् नवासें मूपाहां मन्त्री चित्रकारं यल देशय् च्वंगु दक्वं जातीय समाज छप्पँ जुयाः सक्रिय जुइमाःगु खँय् बः बियादिसें अज्याःगु संगठनं याःगु ज्याय् प्रदेश सरकार आवश्यक ग्वाहालि व समन्वय यायेत तयार दु धयादिल ।
यल महानगरपालिकाया प्रमुख चिरिबाबु महर्जनं नं यल देय्या जातीय समाजयात क्रियाशील याना तयेमाःगु खँय् बः बियादिसें समाजया क्रियाशीलताया निंतिं महानगरपालिष्का न्ह्याबलें नं सहयोगीया रुपय् दइ धयादिल ।
समाजया नायः विनोद ताम्रकारं नेवाः समुदायया एकता व हकहितया निंतिं जातीय समाज दथुइ सहकार्य व समन्वय यानाः न्ह्याः वनेमाःगु आवश्यक जूगु खँय् बः बियादिसें नेवाः समुदाय दुनेया थीथी जातीय समाज दथुइ सहअस्तित्व व समानताया निंतिं न्ह्याः मवंतले झीसं कयागु लक्ष्य हासिल याये फइ मखु धयादिल ।
यल जिल्लाया थीथी नीछगू जातीय समाजया प्रतिनिधित्व जुइकथं हालय् जक गठन याःगु यल नेवाः समाजया संयोजक कृष्णलाल कर्माचार्यं यलया जातीय समाज दथुइ मंकाः भावनाया ठोस अभिव्यक्ति हे यल नेवाः समाज खः धासें थुकियात न्ह्यःने यंकेत सकसितं थःथःगु थासं ग्वाहालि यायेत इनाप यानादिल ।
ज्याझ्वलय् एसइइ उत्तीर्ण जुयादीपिं समाजया विद्यार्थीपिंत मतिनाया चिं लःल्हासे हनेज्या नं याःगु खः । अथे हे समाजया थीथी ख्यलय् योगदान बियादीपिं व समाजयात थीथीकथं ग्वाहालि यानादीपिंत नं हनेज्या याःगु खः।
ज्याझ्वलय् नेपालभाषा मंकाः खलः यलया नायः हिराकाजी महर्जन, थीथी जातीय समाजया नायः, पदाधिकारी, प्रतिनिधि, समाजया निवर्तमान नायः रवीन्द्रराज ताम्रकारलिसें पूर्वअध्यक्ष, पदाधिकारी दुजःपिनिगु उपस्थिति दुगु खः ।
LEAVE YOUR COMMENTS