
येँ – थनया बसन्तपू लाय्कुलिइ च्वंगु माजु देगःया पुनःनिर्माण जुइगु जूगु दु । २०७२ साल बैशाख १२ गतेया विनाशकारी तःभुखाचं पाःताः जुइक दुंगु देगःया पुनःनिर्माणया निंतिं छगू पुजा जूगु दु । येँ महानगरपालिकाया प्रमुख विद्यासुुन्दर शाक्यं देगः पुनःनिर्माणया निंतिं पुजा यानादीगु खः ।
महानगर प्रमुख शाक्यं महानगर लागा दुनेया ऐतिहासिक, सांस्कृतिक व पुरातात्विक महत्वया अमूल्य सम्पदाया रुपय् दयाच्वंगु माजु देगः स्थानीय वासिन्दा व जनताया आस्थाया केन्द्र व समग्र देय्या हे चिउताया नं विषय खः धयादिल । वि.सं. १६९० सालय् तत्कालीन मल्ल जुजु भूपतीन्द्र मल्लया अजि ऋद्धिलक्ष्मीं ताःहाकःगु स्वाहने दुगु देगःया रुपय् उगु देगः दयेके बिउगु खः ।
वइगु निदँया दुने दयेके क्वचायेगु लक्ष्य कयातःगु देगः पुनःनिर्माणया निंतिं येँ मनपा हनुमानध्वाखा दरवार संरक्षण समितिया सानु सुवाल व पवन जोशीया नेतृत्वय् दुगु प्राकृतिक कम्पनीं पुनःनिर्माणया जिम्मा कयातःगु दु ।देगः पुनःनिर्माणय् न्यागू करोड पीगुंगू लाख तका खर्च जुइगु अनुमान यानातःगु दु ।
LEAVE YOUR COMMENTS