ने. सं. ११४६ बछलागा तृतीया -

भाग फ्वंगु खँ भ्रामक व अतिरञ्जित

येँ – मन्त्रिपरिषद विस्तारया झ्वलय् प्रधानन्यायाधीश चालेन्द्र शम्शेर जबरां थःगु भाग फ्वन धकाः वःगु समाचार सर्वोच्च अदालतं खण्डन याःगु दु । सर्वोच्च अदालतया प्रवक्ता बाबुराम दाहालं म्हिगः छगू प्रेस विज्ञप्ति जारी यासें प्रधानमन्त्रीया सिफारिसय् जुइगु मन्त्रिपरिषदया गठन व विस्तारय् प्रधानन्यायाधीशयात असान्दर्भिक रुपय् स्वानातःगु धाःगु दु ।

प्रवक्ता दाहालं जारी याःगु प्रेस विज्ञप्तिइ धयातःगु दु, ‘संविधानतः प्रधानमन्त्रीया सिफारिसय् जुइगु मन्त्रिपरिषद्या गठन व विस्तारया विषयय् सम्माननीय प्रधानन्यायाधीशयात असान्दर्भिक रुपय् स्वानाः अतिरञ्जित लिसें भ्रामक समाचार पिहां वःगु तसकं दुःखद् व खेदजन्य अवस्था खः ।’

व स्वयां न्ह्यः सर्वोच्च अदालत बार एसोसिएसनया पदाधिकारीपिंत नापलायेगु झ्वलय् प्रधानन्यायाधीश जबरां मन्त्रिपरिषद विस्तारय् थःम्हं नं भाग फ्वन धकाः पिहां वःगु समाचार झुट जूगु खँ धयादीगु खः ।

म्हीग व म्हिगः थीथी सञ्चार माध्यमय् मन्त्रिमण्डल विस्तारय् प्रधानन्यायाधीश जबरायात नं मन्त्रिपरिषद्य् कोटा क्वःछिउगु समाचार पिदंगु खः । थ्व समाचार पिहां वयेवं सर्वोच्च बारया पदाधिकारीपिंसं चिउताः प्वंकाः प्रधानन्यायाधीशयात नापलाःगु खः । सर्वोच्च अदालत बारया अध्यक्ष पूर्णमान शाक्यया नेतृत्वय् वंगु बारया पदाधिकारीपिं लिसे खँ ल्हायेगु झ्वलय् प्रधानन्यायाधीश जबरां मखुगु समाचार पिथनाः स्वतन्त्र न्यायालययात प्रहार याःगु धासें अज्याःगु खँ थःगु पाखें मजुइगु खँ धयादीगु खः । लिसें प्रधानन्यायाधीश जबरां उगु समाचारयात कयाः खण्डन यायेगु खँ नं बारया पदाधिकारीपिंत जानकारी याकूगु खः ।

थ्वहे झ्वलय् नेपाल बार एसोसिएसनं मन्त्रिपरिषद विस्तारया झ्वलय् प्रधानन्यायाधीश जबरां भाग फ्वन धकाः पिदंगु समाचारप्रति ध्यानाकर्षण जूगु धासें अज्याःगु ज्या खेदजनक जूगु खँ धाःगु दु । म्हिगः नेपाल बारया महासचिव लीलामणि पौडेलं जारी याःगु विज्ञप्तिइ धयातःगु दु, ‘न्यायापालिकाया प्रमुखं कार्यकारी पदय् भाग मालेगु ज्यां राज्यया निकाय दथुइया शक्ति सन्तुलन व नियन्त्रण, शक्ति पृथकीकरणया सिद्धान्त, संवैधानिक सर्वोच्चता, स्वतन्त्र, सक्षम व निष्पक्ष न्यायपालिकाया अवधारण प्रतिकूल जुइ, थज्याःगु ज्यायात कयाः विरोध व भत्र्सना यानाच्वना ।’

उकथं हे विज्ञप्तिइ धयातःगु दु, ‘सञ्चार माध्यमया समाचार सत्य खःसा थ्व तसकं असंवैधानिक व राज्य संयन्त्रय् लिच्वः लाइगु, संविधानया घोर उल्लंघन जुयाः चरम अराजकता ब्वलनीगु व अन्ततः असफल राष्ट्र जुइगुपाखे न्ह्याः वनीगु ज्या खः ।’

उकथं हे विज्ञप्ति थ्व विषययात सामान्य रुपं मकायेत नं बारं ख्याच्वः बियातःगु दु । यदि थ्व विषययात सामान्य रुपं काल धाःसा नेपाल बार एसोसिएसन न्यायापालिका व सरकारया विरुद्ध आन्दोलनय् वनेमाली धासें ख्याच्वः बिउगु खः ।

ओलीयाके नं भाग फ्वंगु जुयाच्वन
प्रधानन्यायाधीश चोलेन्द्र शम्शेर जबरां एमाले अध्यक्ष केपी शर्मा ओली प्रधानमन्त्री जुयाच्वंगु इलय् नं मन्त्रिपरिषदय् भाग फ्वंगु खँ एमालेया सूत्रं धाःगु दु । सूत्रया कथं तत्कालीन इलय् प्रधानन्यायाधीश जबरां थः जिचादाजु केशवप्रसाद उप्रेतीयात मन्त्री दयेकेगु प्रस्ताव याःगु खः । उकियात कयाः एमाले महासचिव ईश्वर पोखरेल व संसदीय दलया उपनेता सुवास नेम्वाङं तत्कालीन प्रधानमन्त्री केपी शर्मा ओलीयात गुगुं नं हालतय् प्रधानन्यायाधीशया कोटां मन्त्री दयेके मजिउगु अडान काःगुलिं प्रम ओली लिचिउगु खः ।

उकथं हे प्रधानन्यायाधीश जबरां थम्हं सिफारिस यानापिं निम्हेसित राजदूत दयेकेमाः धकाः प्रस्ताव याःगु खःसा उकियात नं प्रम ओलीं अस्वीकार याःगु खँ धाःगु दु । प्रधानमन्त्री ओली न्हापा प्रधानन्यायाधीशया सिफारिसय् मन्त्री व राजदूत बीत तयार जुइधुंकूगु खःसां पार्टीया नेतातय्सं हे विरोध यायेवं लिचिउगु खँ धाःगु दु । उप्रेती मन्त्री जुइगु नितिं तयार जुयाः लँ सुरुवा तकं पुनाः वयेधुंकूगु खँ नं सूत्रं धाःगु दु ।