विश्वकप फुटसल : नेपाली टिम अर्जेन्टिनापाखे

येँ – विश्वकप फुटसलय् ब्वति कायेगु निंतिं नेपाली टिम अर्जेन्टिना वंगु दु । गृहमन्त्री रामबहादुर थापां विश्वकप फुटसलय् ब्वति कायेत वनीपिं नेपाली टिमयात बिहिवाः मन्त्री निवास पुल्चोकय् बिदाइ यानादीगु दु । विदाइ समारोहय् न्ववासें गृहमन्त्री थापां नेपालं बांलाःगु प्रदर्शन याइगु खँय् थः आशावादी जूगु खँ धयादिल ।

विश्वकप फुटसलया झिंनिक्वःगु संस्करणय् ब्वति कायेगु निंतिं बुधवाः जक नेपाली राष्ट्रिय टोलीया घोषणा जूगु खः ।
समीर कार्की कप्तान जुइगु नेपाली पुचलय् दीपेन्द्र रसाइली, वरदान लामा, दिनेश श्रेष्ठ, विशाल थापा, सुजन बलामी, साहिल राना, राजु बुढाथोकी, अनुप राना, गौरव श्रेष्ठ, सञ्जीव तामाङ्ग व ग्रिजेशमान श्रेष्ठ लाःगु दु । प्रशिक्षक कमल विष्ट जुयाच्वंगु दु । समूह ‘डि’ इ लानाच्वंगु नेपाली टिमं क्यानडा, क्याटलना (स्पेन) व फ्रान्सलिसे धेंधेंबल्लाः याइ ।

न्हापांगु कासाय् चैत १८ गते क्यानडालिसे म्हितीसा निगूगु कासा क्याटलनालिसे १९ गते म्हिती, अथेहे दकलय् लिपांगु कासा चैत २० गते फ्रान्सलिसे म्हिती । शीर्षस्थानय् लाःगु निगू टिम क्वार्टरफाइनलय् दुहां वनी । विश्वकप फुटसलय् नेपाः वाइल्ड कार्ड पाखें सहभागी जूगु खः ।

सम्बन्धित बुखँ

LEAVE YOUR COMMENTS