नेपाल पुलिस व एन्फा दथुइ सम्झौता

येँ (नेपालभाषा टाइम्स) – नेपाल पुलिस स्कुल व अखिल नेपाल फुटबल संघ (एन्फा) दथुइ नेपाल पुलिस स्कुल फुटबल एकेदेमि स्थापना यायेगु सम्बन्धी छगू सम्झदारी जूगु दु। प्रहरी प्रधान ज्याकुथिइ आइतवाः जूगु छगू ज्याझ्वःया दथुइ उगु सम्झदारी जूगु खः । सम्झदारी पती नेपाल पुलिस स्कुल साँगा विद्यालय व्यवस्थापन समितिया अध्यक्षलिसें प्रहरी अतिरिक्त महानिरीक्षक निरजबहादुर शाही व एन्फा अध्यक्ष कर्मा छिरिङ शेर्पां ल्हाःचिं तयादीगु खः ।

ज्याझ्वलय् नवासें प्रहरी महानिरीक्षक शैलेश थापा क्षेत्रीं एन्फां नेपाल पुलिस स्कुलयात सहकार्यया निंतिं छनोट याःगु खँय् लसता प्वंकादिसें एन्फाप्रति आभार प्वंकादिल । वय्कलं एकेदेमिया स्थापनां पुलिस स्कुलया उत्कृष्ट फुटबल स्वयेगु थःगु इच्छा पूवनीगु विश्वास नं प्वंकादिल ।

एन्फा अध्यक्ष शेर्पां प्रहरीया गौरवमय इतिहासय् थप न्हूगु ज्याया शुरुवातय् सहकार्य यानाः न्ह्याः वने खंगुलिं थःत लसता वःगु नापं गौरवान्वित जूगु धयादिल । प्रहरीया खेलकुदया विकासया निंतिं सहमतिकथं ग्वाहालि यायेत एन्फा न्ह्याबलें तयार दुगु नं वय्कलं धयादिल ।