किपुलिइ न्हापांखुसी मिसातय्सं धाःबाजं थात

किपू – थनया श्रीपंचमि मानन्धर गुथिपाखें थुगुसी न्हापांखुुसी मिसातय्त नं धाःबाजं प्रशिक्षण बियाः गुंला वनेगु शुरु याःगु दु । गुंलाया निंतिं हे धकाः वंगु लत्या न्ह्यवंनिसें गुथिया मिसातय्त लक्षित यानाः धाःबाजं प्रशिक्षण बिया वयाच्वंगु खः ।वाद्यगुरुपिं ज्ञानेश्वर निभाः, बुद्ध मानन्धर, हरिकृष्ण मानन्धर व धर्म मानन्धरपिंसं द्यः ल्हायेगु, च्वः, जति व एकताल प्रशिक्षण बिया वयाच्वंगु खः ।

गुथिया बाजागाजा उपसमितिया ग्वसालय् जुयाच्वंगु बाजं प्रशिक्षणय् शुरुइ नीम्ह मिसा सहभागि जूगु खःसा थौंकन्हय् झिंन्याम्ह मिसातय्सं बांलाक हे बाजं थायेगु सयेकाः गुंलाया झ्वलय् बाजं थानाः वनेगु जुयाच्वंगु गुथिया नायः सिद्धिकुमार मानन्धरं ‘नेपालभाषा टाइम्स’ यात जानकारी बियादिल ।

गुंलाजःछि गुथिपाखें धाःबाजंलिसें न्यकू पुयाः किपू देय् चाःहिलेगु याना वयाच्वंगु दुसा जुगःचः¥हे (पंजरां) कुन्हु स्वयम्भूइ वनेगु यानाच्वंगु दु । गुंलाया दकलय् लिपांगु न्हि यंलाथ्व पारुकुन्हु गुथिपाखें बुंगद्यःयाथाय् वनाः पारु भ्वय् न्यायेकाः गुंला क्वचायेकेगु याना वयाच्वंगु दु ।
गुंलाया इलय् गुथिया गुथ्याःपिंसं बाजंयात थःथःगु छेँय् दुकायेगु तक थन चलन दुगु संचारकःमि ज्ञान महर्जनं जानकारी बियादिल ।

गुंलाया इलय् थथे बाजंयात छेँय् दुकायेबलय् छेँजःपिं सुयातं ल्वचं मकइगु व छेँय् नं भिं जुइ धइगु विश्वास दु । गुथिपाखें गुंलाया इलय् शनिवाःपतिकं नेवाः वसः पुनाः वयेमाःगु नियम दयेकातःगु दुसा उकथं वसः पुना मवल धाःसा बं पुइकेगु व्यवस्था तकं यानातःगु दु ।

गुंलायात हे लक्षित यानाः गुथिपाखें थुगुसीनिसें बासुरी पुइगु नं प्रशिक्षण बिउगु खःसा शनिवाःपतिकं नेवाः वसतय् बाँसुरी पुयाः देय् चाःहिलेगु गुथिं जानकारी बिउगु दु ।

सम्बन्धित बुखँ

LEAVE YOUR COMMENTS