ने. सं. ११४६ चाैलागा त्रयोदशी - थिमि बालकुमारी जात्रा

प्रधानया फैसला असोजय् जक

येँ -क्वथा बालं मबिउ धइगु द्वपं बिसें सर्वोच्च अदालतय् रिट लाःम्ह येँया स्थानीय मय्जु सरश्वती प्रधानया मुद्दाय् सवोच्च अदालतपाखें असोजपाखे जक फैसला न्यंकेफुगु खँ धाःगु दु । थ्व रिटय् सुनुवाई यायेगु धकाः असोजय् मिति तःगु दु । छुं जुयाः अबलय् सुनुवाई जुयाः ई दत धाःसा फैसला नं जुइगु सम्भावना दुसां सर्वोच्च अदालतय् यक्व मुद्दात दइगु जूगुलिं प्रधानया रिटय् वहस तक नं मजुइफुगु खँ नं धाःगु दु ।

मय्जु प्रधानयात थःगु हे छेँय् क्वथा बालं मबिउ धकाः लमजुङया रुपा सुनार (कामीं) सर्वोच्चय् रिट तःगु खः । सुनारं थ्व रिटय् तत्कालीन शिक्षा मन्त्री कृष्णगोपाल श्रेष्ठयात नं व्दपं बियाः कारवाही यायेमाः धकाः माग याःगु खः । उकी सर्वोच्च अदालतं माःगु छानबिन यानाः २५ न्हुया दुने रिपोर्ट बिउ धकाः आदेश बिउगु खः ।

तर २५ न्हु वनेधुंकाः नं श्रेष्ठया विषयय् छुं हे छानबिन मजूगु कारणं वय्कःयात सुनारं बिउगु दोषया छुं हे प्रमाण मदु धइगु पुष्टि जुइगु खँ धाःगु दु ।