मिसा खलःया स्वीप्यदँ बुन्ह्
येँ (नेपालभाषा टाइम्स)- नेपालभाषा मिसा खलःया स्वीप्यदँ बुन्हि छगू ज्याझ्वःया दथुइ हन । जगतसुन्दर ब्वनेकुथिइ जूगु मिसा खलःया बुन्हिया लसताय् थीथी ख्यलय् योगदान यानादीपिं नापं खलःयात थीथी कथं ग्वाहालि यानादीपिंत हनेज्या नं याःगु खः ।
मिसा खलःया नायः धर्मशोभा तुलाधरया सभापतित्वय् जूगु ज्याझ्वलय् मूपाहांकथं झायादीम्ह न्ह्यलुवा समाजसेवीलिसें नांजाःम्ह उद्योगपति मय्जु अम्बिका श्रेष्ठं त्वाःदेवाय् मत च्याकाः ज्याझ्वःया उलेज्या यानादीगु खः । मिसा खलःया छ्याञ्जे पे्रमहिरा तुलाधरं लसकुस यानादीगु ज्याझ्वलय् ब्वनेकुथिपाखें कुमारि चचा प्याखं न्ह्यब्वसे ज्याझ्वः न्ह्याकूगु खः ।
खलःया बुन्हि हना ज्याझ्वलय् वरिष्ठ साहित्यकार राजा शाक्ययात विशेष हनेज्या याःगु खः । वय्कःयात मूपाहांपाखें पलिंगां न्ययेकाः हनापौ देछासे हनेज्या याःगु खः ।
ज्याझ्वलय् थीथी ख्यलय् योगदान यानादीपिं व्यक्तित्वपिंत हनेज्यालिसें सिरपाः नं लःल्हाःगु खः । थ्व झ्वलय् मय्जु मेनुकादेवी तुलाधरयात प्यक्वःगु कमला लुमिन नेपालभाषा हःपाः सिरपाः लःल्हाःगु खः । थुकथं हे वरिष्ठ मिसा ल्वय् विशेषज्ञ डा. कोकिला वैद्ययात प्यक्वःगु रमा–कौशल्या सिरपाः लःल्हाःगु खः । उगु इलय् तुलाधर व डा. वैद्ययात मूपाहांपाखें पलिंगां न्ययेकाः हनापौ लःल्हानादीगु खःसा दातापाखें लुमिनकुमार व डा. वैद्ययात दाता नांजाःम्ह आख्यानकार मथुरा साय्मिं दां लःल्हानादीगु खः ।
थुकथं हे खलःयात थीथीकथं ग्वाहालि यानादीपिं खलःया आजीवन जः डा. ज्योतिप्रभा तुलाधर, मोतिलक्ष्मी शाक्य, कमला वज्राचार्य, अमृता रञ्जितपिंत हनेज्या याःगु खः । थुकथं हे ज्याझ्वलय् मय्जु सदिक्षा कारंजितयात वय्कलं यानादीगु समाजसेवाया निंतिं कदरपत्र लःल्हासे हनेज्या याःगु खः ।
ज्याझ्वलय् मूपाहां अम्बिका श्रेष्ठलिसें मिसा खलःया संरक्षक सुवर्णकेशरी चित्रकार, सम्मानित व्यक्तित्वपिं मेनुकादेवी तुलाधर, डा. कोकिला वैद्य, मोतिलक्ष्मी शाक्य, राजा शाक्य, सिरपाः दाता मथुरा साय्मि, साहु पञ्चवीर सिंह तुलाधर, खलःया निवर्तमान नायः मंगला कारंजितपिंसं भिंतुना न्वचुलिसें नुगःखँ तयादीगु खः ।
LEAVE YOUR COMMENTS