ने. सं. ११४४ ञलाथ्व नवमी -

‘न्यतमरु अजिमा’ यात द्यः दयेकाः अन्त्येष्टि

येँ – न्यतमरु अजिमाया द्यः प्याखं पिहां वइबलय् अजिमा जुयाः प्याखं हुलेगु यानादीम्ह भाजु लक्ष्मीनारायण महर्जन म्हीग मंत ।वय्कःया अन्त्येष्टि म्हिगः थनया लुतिइ याःगु खः । न्यतया छेँय् च्वनीम्ह वय्कः आकाझाकां अक्सिजन म्हो जुयाः मदुगु खँ छेँजःपिंसं धाःगु दु । मदये न्ह्यः तक वय्कः स्वस्थ दुगु खँ नं धाःगु दु । वय्कःया सिथं यंकेगु झ्वलय् द्यः जात्रा याये थें शवयात खतय् तयाः यंकूगु खः । वय्कः निक्वःगु ज्याजंक्व नं क्वचायेधुंकूगु व लिसें द्यः नं जुयाच्वंगुलिं थुकथं जात्रा याना सिथं यंकूगु खँ वय्कःया काय्भाजु देवकृष्ण महर्जनं ‘नेपालभाषा टाइम्स’ यात कनादिल ।

वय्कःया जन्म वि.सं. १९८२ सालं जूगु खःसा वय्कः थः अबु मदयेधुंकाः वि.सं. २०१८ सालं न्हापांखुसी द्यः जुयादीगु खः । वि.सं. २०१८ सालंनिसें वय्कः वंगु २०७४ वैशाख तक नं द्यः जुयाः प्याखं हुलाः सांस्कृतिक ज्याय् सक्रिय जुया हे च्वनादीगु खँ नं कायभाजु महर्जनं कनादिल । वय्कः दकलय् लिपा हनुमानध्वाखा दरवारय् २०७४ साल वैशाखय् राष्ट्रपति विद्यादेवी भण्डारी समेत झाःगु ज्याझ्वलय् प्याखं हुलादीगु खँ नं वय्कःया कायभाजुं कनादिल ।
वय्कः मदय्धुंकाः आः वय्कःया थासय् वय्कःया हे काय्भाजु देवकृष्ण महर्जन न्यत अजिमा कथं प्रतिस्थापित जुइगु खँ धाःगु दु । थ्वहे वइगु पाहांचः¥हे निसें काय्भाजु देवकृष्णं अजिमा जुयाः प्याखं हुलेगु ज्या शुरु यानादी । द्यः जूगु कारणं झिंस्वन्हु कुन्हु हे बर्खि दक्वं फुके यायेगु चलन दु ।