मोहनी न्ह्यः बुंगद्यः जात्रा क्वचायेकेगु तयारी

येँ (नेपालभाषा टाइम्स) – असार महिनाया लिपांगु वालय् बुंग द्यःया जात्रा जुइगु खँ धाःगु दु। बुंग द्यःया जात्रा यायेगु निंतिं प्यन्हु न्ह्यवंनिसें बाराही गुथिं रथ दयेकेगु ज्या न्ह्याकूगु खःसा म्हिगः तक ५० प्रतिशत रथ दयेकेगु ज्या क्वचायेधुंकूगु खँ बाराही गुथिया गुथियार दिलकुमार बाराहीं ‘नेपालभाषा टाइम्स’ यात कनादीगु दु ।

वय्कःया कथं वइगु असार १६ गते तक रथया घःचाः व तल्ला दयेकेगु ज्या क्वचायेकेगु कथं ज्या न्ह्यानाच्वंगु दु । ‘वइगु असार २३ गते तक रथ दयेकेगु ज्या क्वचायेकेगु जुइ’ वय्कलं धयादीगु दु, ‘आः बुंगद्यःयात रथय् बिज्याकेगु व रथ सालेगु तयारी बारे सहलह जुयाच्वंगु ।’

वय्कःया कथं आः गुथि संस्थान, द्यः नाप स्वापू दुगु थीथी संघ संस्था व सिडिओ कार्यालय दथुइ सहलह यानाः द्यः रथय् बिज्याके कथं तयारी जुयाच्वंगु दु । रीति कथं द्यः सालेगु तिथिइ द्यः सालेमफुगुलिं आः द्यः सालेगु निंतिं साइत स्वयेमालीगु खँ दैवज्ञ जोतिष किर्तिमदन जोशीं ‘नेपालभाषा टाइम्स’ यात कनादिल । वय्कलं रथ दयेकेगु क्वचायेधुंकाः बांलाःगु न्हि कुन्हु द्यःयात रथय् बिज्याकेगु खँ कनादिसें उकिया निंतिं धाःसा साइत स्वयेम्वाःगु खँ कनादीगु दु ।

न्हापा न्हापा सिथि नखः न्ह्यः हे बुंगद्यःया जात्रा क्वचायेकेमाः धयागु धापू दयाच्वंगु खः । वय्कलं बुंगद्यःया जात्रा मोहनी न्ह्यः जक क्वचाःसां गाःगु खँ नं कनादीगु दु। वय्कलं धयादिल, ‘न्हापा सिथि नखः व जावलाख्यः जात्रा छन्हु हे लाःसा जिउ धइगु कारण निगुलिं नखः छक्वलं हनेदत धाःसा म्हचाइ धयागु ल्याखं जक खः, सिथि नखः कुन्हु हे जात्रा क्वचायेकेमाः धइगु मदु ।’

वय्कलं मोहनी नखः न्यायेकेगु झ्वलय् बुंगद्यःया जात्राय् तक्यने मफइगु जुयाः मोहनी नखः न्ह्यःहे जात्रा क्वचायेकेगु परम्परा दुगु खँ कनादिसे धयादिल, ‘मोहनी नखः धुंकाः स्वन्ति वइ, वयां लिपा वा लयेगु ई वइ, अनं लिपा यःमरी पुन्हि वइ, यःमरि पुन्हि कुन्हु न्हूगु जाकिया यःमरि दयेकाः बुंगद्यःयात छायेमाःसा मेखे बुंगद्यः नं यलया तःबहालय् बिज्याकेगु ज्या जुइ । अथे जुयाः मोहनी नखः न्ह्यः जात्रा क्वचायेकेमाःगु खः ।’

अथे हे बुंगद्यःया पानेजु कपिल गुर्जु नं द्यःया जात्रा दिके मजिउगु खँ कनादिसें जात्रा न्ह्याइगु दावी यानादीगु दु। वय्कलं द्यःया न्हवं यायेधुंकाः जात्रा क्वचायेकेमाः धासें मोहनी न्ह्यः द्यःया जात्रा क्वचाइगु दावी नं यानादीगु दु ।

उकथं हे यल ज्यापु समाजया नायः चन्दमान महर्जनं गुथि संस्थान लिसे सहलह लिपा जात्रा यायेगु बारे निर्णय जुइगु जानकारी बियादीगु दु ।

सम्बन्धित बुखँ

LEAVE YOUR COMMENTS