मेलम्चीं लः छ्वयाहयेगु दिकल

येँ (नेपालभाषा टाइम्स) – मनसुनी वा वयेगु तच्वया वयेवं मेलम्चीं लः छ्वयाहयेगु दिकूगु दु । मेलम्ची खानेपानी विकास समितिं म्हिगः निसें सुरुङ बन्द यानाः लः छ्वयेगु दिकूगु खः । समितिं गुबलय् तक सुरुङ बन्द जुइ मधाःनिसें बिहिवाः बुलुक लः बा वःगु लिसें अनया अस्थायी संरचनाय् नं क्षति याःगुलिं लः बन्द यायेमाःगु खँ धाःगु दु ।

वंगु २०७८ सालय् मेलम्चीइ तसकं खुसिबाःया लिसें गेग्रान चुइकाहयेवं मेलम्चीया मू हेडवक्र्स हे स्यंका बिइवं मेलम्चीं दँय्दसं तसकं वा वइगु असार साउनय् लः बन्द यायेगु याना वयाच्वंगु दु । स्वनिगःया लखौं मनूतय्गु निंतिं त्वनेगु लः छ्वयाहइगु मेलम्ची बन्द जुइवं लःया समस्या जुइगु खनेदया वःगु दु ।

काठमाडौं उपत्यका खानेपानी लिमिटेड (केयुकेएल) मेलम्ची बन्द जूसां वैकल्पिक व्यवस्था यानाः फयांफतले लःया समस्या मजुइकेगु धाःगु दु । तर न्हापा न्हापा नं केयुकेएलं थथे हे बाचा ल्हाःसां लःया समस्या जुइगु जुयाच्वंगुलिं थुगुसी नं माक्व लः कायेमखनीगु खँय् स्वनिगःवासीत चिन्तित जूगु दु । थगुने मेलम्ची लिक्क लाःगु रिवर्मा खुसिया लः सुरुङं छ्वयाहयाः वैकल्पिक व्यवस्था याःगु खःसां थुगुसी अज्याःगु योजना मदुगु मेलम्ची खानेपानी विकास समितिया कार्यकारि अध्यक्ष लक्ष्मीप्रसाद उपाध्यायं कनादीगु दु ।

नेपालभाषा टाइम्स

च्वमिया मेमेगु

• म्येँ हालामि लसता जोशी नं निर्देशनय्
• फ्रान्सय् तांन्वयाः सीपिं अप्वल
• वइगु बुधवाः खामेनीया अन्त्येष्ठि
• सरकारया सच्छिन्हु : ‘जनतां महसुस याइकथं ज्या जूगु मदु’
• निर्देशक खड्गीया निपु म्येँया म्युजिक भिडियो पिदन