काठमाडौं सुनचाँदीया मोतिमाः हनेगु तालिम क्वचाल
येँ (नेपालभाषा टाइम्स)- लुँवह धइगु व्यवसाय जक मखु थ्व येँदेय्या अझ धाये थनया नेवाःतय् मौलिक पेशाय् लाः, झीगु थःगु म्हसीकाय् नं लाः ।
थुकियात व्यवसायया रुपय् जक मकासे प्रशिक्षणया रुपय् नं न्ह्यःने यंकेगु स्वयेमाः । ताकि कन्हय् थ्व ख्यलय् वइपिंसं थुकियात सयेका सीकाः काये फयेमा । झीसं झीगु व्यवसाय लिसे झीगु मौलिक पेशाया नं म्हसीका बीकथं न्ह्याः वनेमाः।
थुगु खँ थनया छत्रपाटी पार्टी पालेसय् काठमाडौं सुनचाँदी व्यवसायी संघं ग्वसाः ग्वःगु झिन्हुया मंगलसूत्र, तिलहरी, जन्तर, नौगेडी, चन्द्रहार आदि थीथी तिसाय् पोते, क्रिष्टल व मोतिमाः हनेगु तालिमय् ब्वति काःपिं प्रशिक्षार्थीपिंत दसिपौ लःल्हायेगु ज्याझ्वलय् मूपाहां येँ महानगरपालिकया उपप्रमुख सुनिता डंगोलं धयादीगु खः ।
वय्कलं धयादी ‘वडा वडाय् थीथी तालिम बीगु झ्वलय् बजारय् छुकिया महत्व दु, छुकिया माग अप्वः दु उकियात ध्यानय् तयाः तालिमत बीफत धाःसा उकिं अझ अप्वः लबः दइ धइगु खँय् जिमिसं विश्वास याना ।’
येँ महानगरपालिकां बीगु आपालं तालिमत सीपमूलक, आयमूलक, रोजगारीमूलक नापं येँ देय्या मौलिकतानाप नं स्वापू दुगु जुइमाः धइगु उद्देश्य कयातःगुलिं वइगु दिनय् येँ महानगरपालिका सुनचाँदी व्यवसायी संघनापं सहकार्य याना वनेगु जुइ धयादिल ।
काठमाडौं सुनचाँदी व्यवसायी संघंया अध्यक्ष सुरेश शाक्यया सभापतित्वय् जूगु तालिम समापन व दसिपौ लःल्हायेगु ज्याध्वःया विशेष पाहांकथं येँमपाया प्रवक्ता नापं १७ वडाअध्यक्ष नविन मानन्धर, नेपाल सुनचाँदी व्यवसायी महासंघया अध्यक्ष माणिकरत्न शाक्य, नेपाल सुनचाँदी व्यवसायी संघया केन्द्र अध्यक्ष महेन्द्ररत्न शाक्यपिं झायादीगु खः ।
कुसुमवियालाछिस्थित संघया तालिम भवनय् जूगु तालिमय् मुक्कं भिंmप्यम्ह प्रशिक्षार्थीपिंसं ब्वति काःगु खः ।
LEAVE YOUR COMMENTS