मेलम्चीया ठेकेदारं छ्वया हल वार्ता यायेगु प्रस्ताव

येँ – मेलम्ची आयोजनाया ठेक्का त्वःताः बिसिउँ वनेगु कुतः याःगु ठेकेदार कम्पनी सीएमसी वार्ता यायेत तयार जूगु दु । सीएमसीं अनौपचारिक रुपय् आयोजनालिसे वार्ता यायेगु सन्देश छ्वयाहःगु दु । ‘सीएमसीं वार्ताय् च्वने चाहे जूगु सन्देश अनौपचारिक रुपय् छ्वयाहःगु दु, आः जिमिसं छु यायेगु धकाः सोचे याना च्वनागु दु’ मेलम्ची खानेपानी विकास बोर्डया कार्यकारी निर्देशक सूर्यराज कँडेलं कनादिल ।
वय्कलं वइगु छवाः दुने मेलम्चीया ज्या गुगु प्रक्रियां न्ह्याकेगु धइगु बारे क्वःजिउगु खँ कनादिल । मेलम्चीया ल्यं दनिगु ज्या सीएमसीयात हे याकेगु वा न्हूगु प्रक्रियाय् वनेगु धइगु क्वःछी ।

मेलम्ची आयोजना वंगु पुस २ गते निसें अवरुद्ध जुयाच्वंगु दु । मेलम्चीया ठेकेदार थःपिं ताथ जूगु धासें ज्या त्वःताः बिसिउँ वनेत्यंगु खःसा नेपाल प्रहरीया ग्वाहालिइ ज्वनाः खानेपानी मन्त्रालययात लःल्हाःगु खः । लिपा इटालीयन दूतावासया ग्यारेन्टीं ठेकेदार कम्पनीया कर्मचारीयात क्रिसमस व न्यूयर माने यायेगु निंतिं इटाली छ्वःगु खः ।