नाउपाया अडानं सुदूरपश्चिमय् सत्ता संकट
येँ (नेपालभाषा टाइम्स)÷सुदूरपश्चिम प्रदेशया मुख्यमन्त्री राजेन्द्रसिंह रावलं म्हिगः विश्वासया मत कायेगु ज्याझ्वः दुगु खःसां नागरिक उन्मुक्ति पार्टीया सांसदत उपस्थित मजुइवं बैठक हे स्थगित याःगु दु । मुख्यमन्त्री रावलं बैठक थौं तक तयेगु नितिं प्रदेशसभा सचिवालययात इनाप यानाः स्थगित याकूगु खः ।
सुदूरपश्चिम प्रदेशया सरकार गठनय् नागरिक उन्मुक्ति पार्टी निर्णायक जुयाच्वंगु दु । नाउपाया फुक्कं धइथें सांसदत येँय् च्वनाच्वंगु खः । पार्टीया अध्यक्ष रञ्जिता श्रेष्ठं तत्काल प्रदेश सरकारयात विश्वासया मत बी मफइगु खँ धयादीधुंकूगु दु ।
वंगु पुस २७ गते मुख्यमन्त्री नियुक्त जूम्ह रावलं थौंया दुने विश्वासया मत कायेमाःगु खः । थौं तकया दुने विश्वासया मत कायेमफुत धाःसा मुख्यमन्त्रीया पद स्वतः मदइगु व्यवस्था दु । अथे जुयाः वय्कलं थौं न्ह्याथेयानाः जूसां विश्वासया मत कायेगु तयारी यानाच्वंगु दु ।
तर नाउपां धाःसा थः पार्टीया संस्थापक नेता रेशम चौधरीयात मत्वःतूतले विश्वासया मत मबीगु अडान कयाच्वंगु दु । थुकिं यानाः थौं नं मुख्यमन्त्री रावलं विश्वासया मत कायेफइगु अवस्था मदुगु खँ धाःगु दु ।
५३ म्ह दुजः दुगु सुदूरपश्चिम प्रदेशय् नाउपाया न्हय्म्ह सांसद दु । थ्व ल्याः प्रदेशय् सरकार दयेकेगु निसें फुक्क धइथें प्रक्रियाय् निर्णायक शक्ति खः । नाउपाया समर्थत मदुतले मुख्यमन्त्री रावलं २७ म्हेसिया समर्थन खाके फइगु अवस्था मदु ।
सुदूरपश्चिमय् माओवादी केन्द्रया १०, नेकपा एमालेया १० व नाउपाया ७ व राप्रपाया छम्ह यानाः २८ म्ह सांसद दु । थुकी सभामुख दुमथ्याः । यदि एमाले संसदीय दलया नेता रावलं थौं तक नं विश्वासया मत काये मफुत धाःसा संविधानया धारा कथं तःधंगु दल नेपाली कांग्रेसयात सरकार गठन यायेगु अवसर वनी । थन कांग्रेसया १९, एसया प्यम्ह व छम्ह स्वतन्त्र सांसद दु ।
LEAVE YOUR COMMENTS