ल्याय्म्ह पुस्ता व लिपि गफ

झम्सिख्यःया ‘दि फोएर’य् स्वीदं क्वय्या ६० म्ह स्वयां अप्वः ल्याय्म्हल्यासे सहलह यानाच्वन । इमिगु सहलहया विषय खः लिपि । थ्व हे ल्यासेल्याय्म्हया पुचलय् छम्ह परिपक्वम्ह व्यक्ति प्रदेश नं. ३ या सांसद राजेश शाक्य नं इपिंलिसे गफ यानाच्वन । लिपि विषययात कयाः गफ यायेगु झ्वलय् सांसद शाक्यं रञ्जना लिपिया महिमाया गुणगान यानाच्वन ।

संयुक्त राष्ट्र संघय् नेपाःयात छगू स्वतन्त्र राष्ट्रया रुपय् न्हयब्वयेगु निंतिं प्रतिनिधित्व याःगु रञ्जना लिपिया महत्वपूर्ण भूमिका दुगु वय्कलं धयादिल । देय्यात अन्तर्राष्ट्रियस्तरय् पहिचान याकूगु रञ्जना लिपियात दक्वं नेपाःमिया दथुइ थ्यंकेमाःगु खँय् बः बियादिसें उकिया निंतिं थम्हं सांसद विकास कोषपाखें ५० गू लाख तका दां थ्व हे लिपिया प्रचारप्रसार अभियानया निंतिं ग्वाहालि नं यानागु धयाच्वनादीगु इलय् अन मुनाच्वंपिं सकलें ल्यासेल्याय्म्हत उत्साहित जुल ।

लिसें लिपि विषययात कयाः सहलह यायेत वःपिं न्हू पुस्तायापिंसं अतिकं लसता नं प्वंकल । नेपाल लिपि गुथिं ग्वसाः ग्वःगु ‘लिपि गफ’य् गुथिया नायः निरञ्जन ताम्राकारं थःगु खँ तयेगु झ्वलय् न्हू पुस्तायात नेपाःया मौलिक लिपि स्यनेगु ज्या जुल धाःसा म्होतिं नं न्यय्दँ तक इमिसं मेपिंत नं स्यना वने फइ धयादिल ।

लिपि गफया हे झ्वलय् मिस नेवाः ११३२ सुनिता डंगोलं नेपाल लिपि गुथिलिसेया सहकार्यय् थःगु पुचलं थीथी जिल्लाय् वनाः क्यालिजात्राया नामं रञ्जना लिपिया वर्कसप यानागु ईया न्हयइपुगु अनुभव न्यंकादिल । वय्कलं क्यालिजात्राय् आतक प्यद्वलं मल्याकयात रञ्जना लिपि स्यनेगु ज्या जूगु नं धयादिल ।
थःथाय् ग्राफिक्स व एनिमेशन सयेकः वइपिंत एनिमेशनय् रञ्जना लिपि नं तयाः स्यनेगु यायेमाःगु जुक्ति नं अन पिहां वःगु खःसा ‘वेविनार’ यानाः विदेशय् च्वनाच्वंपिं थःथिति, पासाभाइपिंत रञ्जना लिपि स्यनेगु इच्छा दुगु नं छगू पुचलं प्वंकल । लिपि गफया हे झ्वलय् मेगु पुचलं स्टार बक्सय् थें हे कफि, च्या त्वनेत वइपिंत कपय् हे रञ्जना लिपि च्वयाः बीबलय् गाहाकि नं दंग जुइ खँ न्यंकल ।

मेगु पुचलं रञ्जना लिपियात जन्मन्हि (बर्थडे) केक व कार्डय् नं प्रयोगयाये फइगु सुझाव बिउगु खःसा मेगु छगू पुचलं भ्यालेन्टाइन डे व मतिनाया चिं ‘टोकन अफ लभ’ य् नं व्यापक रुपं रञ्जना लिपि व नेपाल लिपि प्रयोग याये फइगु खँ धाःगु खः ।अथे हे मोबाइलया न्क्ष्ँ व स्टिकरय् नं रञ्जना व नेपाल लिपिया माध्यमं थीथी सन्देश च्वये फइगु खँ अन वःगु खः ।

थुलि जक मखसे युट्युबपाखें नं रञ्जना लिपि स्यने फइगु सुझावया खँ नं अन वःगु खः । फेसबुक थेंज्याःगु लोकंह्वाःगु सामाजिक संजालय् थीथीकथंया किपा तयेथें हे रञ्जना व नेपाल लिपिं च्वयातःगु ल्वहंपौ व उकिया अनुवाद जक नं च्वयाः तये फत धाःसां नं आपालं ऐतिहासिक तथ्य सयेके सीके फइगु खँ न्ह्यःने हयेगु ज्या जूगु खः ।

दकलय् लिपा मेगु छगू पुचलं स्कुलया मस्तय्त इमिगु स्कुल ब्यागय् स्कुलया नां च्वयाः बीबलय् रञ्जना व नेपाल लिपिया प्रचार प्रसार व्यापक जुइगु धाल । झण्डै स्वघौ ताःहाकःगु लिपि गफया दकलय् लिपा गुुथिया न्वकु अनिल स्थापितं रञ्जना लिपिया ऐतिहासिक पक्षया बारे छुं छुं महत्वपूर्ण जानकारी बियादिसें थ्व हे वइगु असार १४ गते बसन्तपुलिइ जुइगु बृहत लिपि नखःया बारे न जानकारी बियादिल ।