बालगोपालेश्वर देगलय् गजू छुत

येँ (नेपालभाषा टाइम्स) – लानिपुखूया दथुइ च्वंगु बालगोपालेश्वर देगलय् म्हिगः गजू छुइगु ज्या जूगु दु। म्हिगः सुथय् पुजा यानाः गजू छूगु खः । म्हिगः अन छूगु गजु १२३ किलो दुसा उकियात ३२.७३ तोला लुँ खर्च यानाः लुँ सीगु ज्या जूगु खः ।

२०७२ सालया तःभुखाचं क्षति जूगु लानिपूखुया देगः दयेकेत थीथी कथं विवाद ब्वलंगु खःसा विज्ञ पुचलं ग्रथकुट (शिखर शैली) देगःया पुनर्निर्माण यायेमाः धकाः सुझाव बिउगु खःसा आः उगु हे शैली देगः दयेकेगु ज्या क्वचाःगु दु। शिखर शैली देगः दयेके मजिउ धकाः पुरातत्व विभागं धायेगु यानाच्वंगु खःसा पुनर्निर्माण प्राधिकरणं पुलांगु हे शैली दयेकेमाः धकाः अडान कायेवं देगः शिखर शैली दयेकेगु ज्या जूगु खः ।

१८९० सालय् ब्वःगु तःभुखाचं क्षति जूगु शिखर शैलीया देगःयात जंगबहादुर राणां बुर्जा शैली पुनर्निर्माण याःगु खः । गजू छुइगु ज्या जुइवं लानिपुखू दयेकेगु ज्या लिपांगु चरणय् थ्यंगु खँ पुनर्निर्माण प्राधिकरणया इन्जिनियर राजु मानन्धरं कनादीगु दु। वय्कःया कथं आः छुं भचा रंग तयेमाःगु व बगैचा दयेकेगु ज्या जक ल्यँ दनि ।

तः भुखाचं क्षति जूगु लानिपुखू पुनर्निर्माण यायेगु निंतिं २०७२ साल माघ २ गते राष्ट्रपति विद्यादेवी भण्डारी उलेज्या यानादीगु खः । आः लानिपुखू दयेकेगु ज्या क्वचायेवं उकिया उलेज्या नं राष्ट्रपति भण्डारीपाखें याकेगु तयारी जुयाच्वंगु दु ।

थ्व स्वयां न्ह्यः लानिपुखुली लः थाकेगु ज्या क्वचाःगु खः । स्थानीय सरोकार समितिया नेतृत्वय् पुखू पुनर्निर्माण जूगु खःसा वयां लिपा अन बागमति खुसिया लः तयेगु ज्या जूगु खः । अन बागमति खुसिं २ करोड लिटर व आकाशं वःगु १ करोड लिटर तःगु खः ।