क्यानेडियन नेवाःतय् न्हूदँया भिंतुना ज्याझ्वः

येँ (नेपालभाषा टाइम्स) – क्यानाडाया एल्भर्टा प्रान्तय् च्वनाच्वंपिं नेवाःतय्सं नं स्वन्ति नखःलिसें ने.सं. ११४१ न्हूदँया भिंतुना ज्याझ्वः याःगु दु । नेवाः कल्चरल सोसाइटी अफ अल्बर्टाया ग्वसालय् कोरोना भाइरसया महामारीया जोखिमयात ध्यानय् तयाः भर्चुअल माध्यमं न्हूदँया भिंतुना कालबिल ज्याझ्वः याःगु खः ।

नेवाः देय् दबूया नायः नरेश ताम्राकार व क्यानाडा नेपाल फे्रण्डशीप एण्ड कल्चरल सोसाइटीया नायः मानकाजी श्रेष्ठया विशेष सहभागिताय् जूगु ज्याझ्वःया उलेज्या संस्थाया नायः डा. हेमन्त जोशीं यानादीगु खः । ज्याझ्वलय् नवासें नायः जोशीं विगतया दँय् संस्थाया ग्वसालय् जुइगु ज्याझ्वलय् क्यानेडियन सरकारया प्रतिनिधिया नं सहभागितां विदेशय् नं नेपालभाषालिसें कला, संस्कृति, भेषभूषायात थाय् बीगु निंतिं महत्वपूर्ण भूमिका म्हितूगु विचाः प्वंकादीगु खः ।

दबूया नायः ताम्राकारं क्यानाडाय् अल्पसंख्यकय् च्वनाच्वंपिं नेवाः समुदायं थःगु संस्कृतियात जीवन्त यानाः सरकार व समाजयात स्वायेगु भूमिका म्हिता वयाच्वंगु तसकं च्वछायेबहगु व महत्वपूर्ण जूगु धासें देश विदेशय् च्वंपिं नेवाःत अझ एकतावद्ध जुयाः छप्पँ जुया वनेमाःगु आवश्यक जूगु खँ कु्लादिल ।

नेवाः समुदाय दगुइ म्हपुजा यायेगु प्रचलन सभ्यताया शुरुवात मजूगु इलंनिसें हे न्ह्याना वयाच्वंगुलिं थ्व तसकं महत्वपूर्ण संस्कृति जूगु वय्कलं धयादिल । नेपाल संवत्या प्रवर्तक शंखधर साख्वालं जनतायात त्यासामुक्त यानाः नेपाः देय्या नामं नीस्वंगु नेपाल संवत् राष्ट्रिय संवत्यात न्हियान्हिथं छ्यलाबुलाय् हयेगु निंतिं न्ह्यःने न्ह्याः वनेमाःगु आवश्यक जूगु नं वय्कलं धयादिल ।

नेवाः समाजया वरिष्ठ दुजः द्वारिकादास श्रेष्ठं नेपाल संवत् व तिथिमितियात कयाः वया च्वनीगु समस्या ज्यंकेत सम्बन्धित निकायत मिले जुयाः न्ह्यज्याये फत धाःसा एकरुपता वइगु विश्वास प्वंकादिल नेवाः कल्चर सोसाइटी अफ ब्रिटिश कोलम्बिया (बीसी)या नायः मानमकाजी श्रेष्ठं ज्याझ्वलय् ब्वति कायेत निमन्त्रण याःगुलिं लसता प्वंकादिसें भ्यानकुभरय् नं नेवाः समुदाययात छप्पँ यानाः वइगु दिनय् थुकथंया ज्याझ्वः यायेत उत्साह ब्वलंगु खँ कनादिल ।

भर्चुअल ज्याझ्वःयात मनोरञ्जन बीगु ल्याखं पुलांगु ज्याझ्वः क्यनेगुनापं मंगल धुन, राजमतिया धुन व थीथी नेवाः धुन हायेकूगु खः । अथे हे संस्थाया पुलांम्ह न्वकु डा. केशव श्रेष्ठ व दुजः रविन्द्र श्रेष्ठं नेवाः म्येँ न्यंकादीगु खःसा न्वकु त्रिप्रसाद धौभडेलं नं नुगः खँ प्वंकादीगु ज्याझ्वलय् नायः जोशीं वइगु दिनय् थुकथंया ज्याझ्वःयात क्यानाडान्यंकं हे यायेगु ग्वसाः दुगु जानकारी बियादिल । संस्थापाखें नेपाल संवत् न्हूदँया लसताय् वंगु न्हय्दँ न्ह्यः सन् २०१३ निसें सामूहिक रुपं म्हपुजा यानाः भिंतुना कालबिल याना वयाच्वंगु दु ।

सम्बन्धित बुखँ

LEAVE YOUR COMMENTS