म्ह्याय् बुइकूसा छगू लाख सिरपाः

येँ – काय माल धासें ग्वाःग्वाः म्ह्याय् बुइकेगु क्रम पनेगु लागिं आः कर्णाली अञ्चलया खाँडाचक्र नगरपालिकाय् छम्ह वा निम्ह म्ह्याय् बुइकाः स्थायी बन्ध्याकरण यात धाःसा अज्याःगु परिवारयात छगू लाख तका सिरपाः बीगु व्यवस्था याःगु दु । छम्ह काय ला मदयेकं मगाः धासें न्हय्म्ह च्याम्ह तक म्ह्याय् बुइकेगु यानाच्वंगु कारणं थुकियात पनेगु लागिं नं थज्याःगु व्यवस्था याये माःगु खँ उगु नगरपालिकां धाःगु दु ।

उलि जक मखु थौंकन्हय् खाँडाचक्र नगरपालिकाय् प्वाथय् दयेवं काय लाकि म्ह्याय् धकाः परीक्षण याइगु व काय खःसा जक बुइकेगु व म्ह्याय् खःसा मचा क्वःथलीगु क्रम नं तसकं अप्वयाच्वंगु खँ धाःगु दु । थुकियात पनेगु लागिं नं काय जूसां म्ह्याय् जूसां छुं मपाः धकाः क्यनेगु लागिं निम्ह तक म्ह्याय् बुइकाः स्थायी बन्ध्याकरण यात धाःसा उमित छगू लाख तका दां बीगु व्यवस्था शुरु याःगु खः ।

लिसें उमिसं बुइकूम्ह उपिं निम्हं म्ह्याय्पिंत तःधिकः जुइकाः नं आखः ब्वनेगु सम्पूर्ण खर्च नगरपालिकां हे व्यहोरे यायेगु व्यवस्था याःगु दु । थथे यायेगु लागिं यक्व खर्च मालीगु खःसां नगरपालिकां मेमेगु शीर्षकया बजेटं क्वपालाः जूसां थुकी खर्च यायेगु तयारी जुयाच्वंगु खँ धाःगु दु ।

कर्णाली लागाय् थौंकन्हय् काय छम्ह मदयेकं मगाः धइगु विश्वासं यानाः म्ह्याय्या भ्रुण हत्या याइगु क्रम न्हापाया तुलनाय् यक्व हे अप्वयाच्वंगु खँ धाःगु दु । थुकियात छुं हे कथं पने मफुसेंलि म्ह्याय् बुइकीपिंत छगू छगू लाख तकाया सिरपाः हे व्यवस्था यायेमाःगु खँ नं धाःगु दु । थ्व व्यवस्था थ्वहे आर्थिक वर्षंनिसें लागू यायेगु ग्वसाः जुयाच्वंगु खँ नं धाःगु दु ।

सम्बन्धित बुखँ

LEAVE YOUR COMMENTS