नेपाल साहित्य मन्दिरया झिंन्याक्वःगु तःमुँज्या
ख्वप(नेपालभाषा टाइम्स) । नेपाल साहित्य मन्दिरया झिं–न्याक्वःगु तःमुँज्या व न्हय्क्वःगु अधिवेशन नेपालभाषा एकेदेमिया चान्सलर मल्ल के. सुन्दरं सुकुन्दाय् मत च्याकाः उलेज्या यानादिल । ज्याझ्वलय् वय्कलं नेपाल साहित्य मन्दिरया ख्वाःपौ ल्याः ५ व मन्दिरया छ्याञ्जे हरिशरण राजोपाध्याय शर्मां च्वयादीगु नेवाः संस्कार संस्कृतिइ दुवाला सफू विमोचन यानादिल । ज्याझ्वलय् मूपाहां मल्ल के. सुन्दरं योगेन्द्र प्रधान थें प्रगतिशील भावनां जाःम्ह मनू मरु त्वालय् च्वनादीगु इलय् हे येँय् थीथी सामाजिक व राजनीतिक गतिविधि अप्वयाच्वंगु व हनु–मानध्वाखय् तःजिक जूगु साहित्य सम्मेलनय् ख्वपय्तय्त सहभागी मयाःगु कारणं नेपाल साहित्य मन्दिरया जन्म जूगु खः धयादिसें नेपाल साहित्य मन्दिरं आः तकं मयाःगु छु दु धकाः न्ह्यसः तयादिल ।
ज्याझ्वःया विशेष पाहां भक्तपुर विकास सहयोग संघया पुलांम्ह नायः कृष्णलाल प्रधानं नेपाली भाषाया सहारा कयाः नं नेपालभाषा थकायेमाःगु ई वयाच्वंगुलिं मत दँपौया लागिं छखे नेपालभाषा व मेखे खस् नेपाली भाषाया माध्यमं सफू पिथनेत थःम्हेसिनं आर्थिक ग्वाहालि यानाच्वनागु कनादिल । वरिष्ठ साहित्यकार कवि डा. योगेन्द्र प्रधानं चक्रपाणी चालिसें व मेमेपिं खय् ब्रम्हुतय्सं कटुञ्जे नापं ख्वप जःखः खस् नेपाली भाषाया साहित्यकारत जानाः धमाधम गोष्ठी व ज्याझ्वःत न्ह्याकाहःगुलिं जक नेपाल साहित्य मन्दिर भाषा थकायेत जन्म जूगु खः धयादिल । सिर्जना अभियानया सचिव धु्रव मधिकर्मि, सफूया च्वमि राजोपाध्यय व मत ५ या सम्पादक राजुराम मुनंकर्मिं नं न्ववानादीगु मुँज्यां न्हूगु ज्यासना पुचः नं नीस्वंगु दु ।
LEAVE YOUR COMMENTS