अनलाइन बाखं मुँज्याया समीक्षा

येँ (नेपालभाषा टाइम्स) – लछि न्ह्यवंनिसें न्ह्यानाच्वंगु नेपालभाषा अनलाइन बाखं मुँज्याया समीक्षा क्वचाःगु दु। वंगु लछि न्ह्यवंनिसें शनिवाःपतिकं बहनिसिया इलय् उगु नेपालभाषा अनलाइन बाखं मुँज्या न्ह्यानाच्वंगु खः । शनिवाःपतिकं बहनि नेपालभाषा साहित्य ख्यःया नांजाःपिं मिसा बाखं च्वमि व न्हूपिं बाखं च्वमिपिनिगु न्हिं न्यापु, खुपु बाखं ब्वनेगु ज्या जुयाच्वंगु खः ।

उगु बाखं मुँज्याय् सुवर्ण केशरी चित्रकार, ईश्वरीमैया श्रेष्ठ, सरस्वती तुलाधर, मनदेवी ताम्राकार, मोतिलक्ष्मी शाक्य, डा. रिना तुलाधर, लोचनतारा तुलाधर, निजिरोस श्रेष्ठ, दिब्या ताम्रकार, रिता महर्जन, रितादेवी प्रधान जोशी, श्रीलक्ष्मी श्रेष्ठ, रेणु श्रेष्ठ, प्रमिला सायमि, अर्चना शाक्य, सुनिता महर्जन व अमिर मैया रञ्जित यानाः झिन्हय्म्हेसिनं थःथःगु बाखं ब्वनादीगु खः । उगु मुँज्याय् वाचन जूगु बाखंयात समालोतकपिं प्रा. प्रेमशान्ति तुलाधर, नवीन चित्रकार, व पूर्ण ताम्राकारं अनलाइनपाखें हे समीक्षा यानादीगु खः ।

वाचन जूगु बाखंयात समीक्षा यानादिसें प्रा. तुलाधरं थौं कन्हय्या बाखनय् मिसा च्वमिपिंसं नं विषयवस्तुइ न्हूगु पहः हःगु नापं वर्तमान समस्यायात कयाः चिउताः क्यनाहःगु खने दुगु विचाः तयादिल ।

साहित्यकार चित्रकारं पाठ जूगु बाखनय् पात्र व थाय्बाय् नं दुगु खःसा अझ स्तरीय जुइगु विचाः प्वंकादिल । अथे हे समालोचक ताम्राकारं बाखनय् पात्रयात नवाकेगु झ्वलय् पात्रं थःगु हैसियत, उमेरकथं छु गथे नवायेमाः धइगु पक्षयात नं विचाः ययेमाः धयादिल ।

उगु नेपालभाषा अनलाइन बाखं मुँज्या वल्र्ड नेवाः अर्गनाइजेसन, अमेरिका च्याप्टरया ग्वसालय् जूगु खःसा मुँज्याया संयोजन अमेरिकाया शिकागोय् च्वनादीम्ह बाखं च्वमि केशरमान ताम्राकारं यानादीगु खः । अथे हे बाखं मुँज्या न्ह्याकेत वासव राजोपाध्याय व प्रमेश श्रेष्ठं ग्वाहालि यानादीगु खः ।